ᑲᒪᓂᐊᖅᑐᑦ ᐱᔪᓐᓇᓚᐅᙱᓐᓂᖓᓐᓂ ᓚᐃᓴᓐᓯᖏᓐᓂ, ᐸᐃᐹᑦ ᐱᓕᕆᒋᐊᕈᓐᓇᐅᑎᑦ ᐊᒻᒪᓗ ᐊᖏᖅᑕᐅᓃᑦ ᐱᔭᕆᐊᓖᑦ ᐱᓕᕆᓂᕐᒧᑦ ᐱᓕᕆᐊᒃᓴᐅᔪᒥᒃ, ᐱᔭᕆᐊᖃᕐᓂᐅᔪᑦ ᓄᓇᕗᒻᒥ ᑲᑐᔾᔨᓯᒪᓂᐅᔪᓄᑦ ᒪᓕᒐᐅᔪᓂᒃ ᐱᓕᕆᔾᔪᓯᖏᓐᓂ ᓈᒻᒪᒋᔭᐅᔭᕆᐊᖃᖅᐳᑦ. ᓄᓇᕗᒻᒥ ᒪᓕᒐᐅᔪᓂᒃ ᐱᓕᕆᔾᔪᓯᖓ ᓴᖅᑭᑎᑕᐅᓯᒪᕗᖅ ᓄᓇᕗᒻᒥ ᓄᓇᑖᕐᓂᒃᑯᑦ ᐊᖏᕈᑎᒃᑯᓐᓂ ᐊᒻᒪᓗ ᖃᔅᓯᒐᓚᖕᓂ ᐃᓚᒋᔭᐅᔪᓂ ᐊᑕᔪᓂᒃ ᒪᓕᒐᑎᒍᑦ, ᓲᕐᓗ ᓄᓇᕗᒻᒥ ᐃᒪᖏᓐᓄᑦ ᐊᒻᒪᓗ ᓄᓇᕗᒻᒥ ᓄᓇᐅᑉ ᖄᖓᓂ ᐱᔪᓐᓇᐅᓯᓕᕆᔨᑦ ᒪᓕᒐᖓᓐᓂ ᐊᒻᒪᓗ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᒧᑦ ᖃᐅᔨᓴᖅᑕᐅᓂᖓᓄᑦ ᒪᓕᒐᕐᒥᑦ. ᓄᓇᕗᒻᒥ ᐱᓕᕆᕝᕕᐅᔪᑦ ᐃᓄᓕᒫᓄᑦ ᒐᕙᒪᐅᔪᓂ ᐱᓕᕆᓂᖃᖅᐳᑦ ᐱᒻᒪᕆᐅᔪᒥ ᐊᑐᕐᓂᖃᐅᑎᖓᓐᓂ ᑲᒪᒋᔭᖃᕐᓂᕐᒧᑦ ᐊᑐᖅᑕᐅᓂᖓᓂ ᐊᑐᒃᑲᓐᓂᕈᓐᓇᖅᑐᓂᒃ ᐱᓕᕆᐊᒃᓴᖏᓐᓂ ᐊᒻᒪ ᐊᑐᒃᑲᓐᓂᕈᓐᓇᙱᑦᑐᓄᑦ ᐱᓕᕆᔾᔪᑎᒃᓴᓄᑦ ᓄᓇᒥᙶᖅᑐᓂ ᐃᑲᔪᕈᑎᒃᓴᐅᔪᓂᑦ ᐃᓗᐊᓂ ᓄᓇᕗᒻᒥ ᐊᖏᖃᑎᒌᒍᑎᑖᒧᑦ ᓄᓇᖁᑎᒋᔭᐅᔪᓄᑦ.

ᑲᒪᓂᐊᖅᑐᑦ ᐱᓕᕆᐊᒃᓴᓂ ᑐᓂᓯᔭᕆᐊᖃᖅᐳᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᖏᓐᓄᑦ (NPC) ᐃᓱᒪᓕᐅᕆᓂᕐᒧᑦ ᐱᓕᕆᐊᒃᓴᐅᔪᖅ ᒪᓕᑦᑎᐊᕋᓗᐊᕐᒪᖔᑦ ᐱᔭᕆᐊᖃᖅᑐᓂ ᓇᓕᐊᑐᐃᓐᓇᓄᑦ ᐊᖏᖅᑕᐅᓯᒪᔪᓄᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ, ᐊᒻᒪᓗ ᒪᓕᑦᑎᐊᕈᓂ, ᐱᓕᕆᐊᒃᓴᐅᑉ ᖃᓄᐃᑦᑑᓂᖓᓂ ᐱᙱᑎᑕᐅᒍᓂ ᐱᔭᕆᐊᖃᕐᓂᐅᔪᓄᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ (NIRB). ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᑦ ᐊᑯᓂᐅᑎᒋᔪᓐᓇᖅᐳᑦ ᐅᓪᓗᓄᑦ 45−ᓄᑦ ᐱᔭᕇᖅᓯᓂᖏᓐᓂ ᐃᓱᒪᒃᓴᖅᓯᐅᕆᓂᖏᓐᓂ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ. ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᑦ ᖃᐅᔨᒋᐊᖅᑕᐅᔪᓐᓇᖅᐳᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓᓂ ᐅᕙᓂ www.nunavut.ca ᐃᓕᑦᑎᒃᑲᓐᓂᕐᓂᕐᒧᑦ ᑐᓂᖅᑯᑕᐅᔪᓂᒃ ᐱᔭᕆᐊᓕᖕᓂᑦ ᐊᒻᒪᓗ ᐊᑑᑎᖃᖅᑐᓂᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ.

ᑕᒪᐃᑎᒍᑦ, ᐊᒥᓱᑦ ᐊᑦᑎᒃᑐᒥ−ᐊᒃᑐᐃᓂᐅᔪᓄᑦ ᐱᓕᕆᐊᒃᓴᐅᔪᑦ, ᓄᓇᓕᖕᓄᑦ ᑐᓂᓯᒃᑲᓐᓂᕐᓂᐅᔪᓄᑦ ᐊᒻᒪᓗ ᐃᓄᑐᐊᑦ ᐅᒥᐊᕐᔪᐊᓄᑦ ᐃᖏᕐᕋᓂᕆᔭᖏᓐᓂ, ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᕼᐋᒻᓚᐅᔪᓄᑦ ᐃᓗᐊᓂ ᐱᙱᑎᑕᐅᒍᓂ ᐱᔭᕆᐊᖃᕐᓂᐅᔪᓄᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᑐᕌᖅᑎᑕᐅᔪᓐᓇᖅᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᖏᑦ ᐃᓱᒫᓘᑎᖃᕈᑎᒃ ᐱᔾᔪᑎᖃᖅᑐᒥ ᐱᑕᖃᑐᐃᓐᓇᕆᐊᖃᕐᓂᖓᓂ ᑲᑎᓕᒫᖅᖢᒋᑦ ᐊᒃᑐᐃᓂᐅᔪᓄᑦ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᖃᐅᔨᓴᐃᑐᐃᓐᓇᓲᖑᕗᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᓂᑦ ᑐᓂᔭᐅᓯᒪᔪᓄᑦ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᖏᓐᓂᑦ. ᐊᑐᖅᑕᐅᔪᒃᓴᑦ 12-1−ᒥ ᓄᓇᕗᒻᒥ ᓄᓇᑖᕐᓂᒃᑯᑦ ᐊᖏᕈᑎᒧᑦ (NLCA) ᐊᒻᒪᓗ ᓇᓗᓇᐃᖅᑕᐅᓯᒪᔪᒥ ᖃᐅᔨᓴᖅᑕᐅᓂᖓᓄᑦ ᐱᙱᑎᑕᐅᒍᓂ ᐊᖏᕈᑎᓂᒃ ᐋᔩᖃᑎᒋᔭᐅᔪᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ ᓇᓗᓇᐃᖅᓯᓯᒪᒍᓂ ᓇᓕᐊᑦ ᐱᓕᕆᐊᒃᓴᐅᔪᑦ ᖃᓄᐃᑦᑑᓂᖏᓐᓂ ᐱᙱᑎᑕᐅᒍᓂ ᐱᔭᕆᐊᖃᕐᓂᐅᔪᓄᑦ ᖃᐅᔨᓴᖅᑕᐅᓂᖓᓄᑦ.

ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᓴᓇᓯᒪᕗᖅ ᐃᓱᒪᒃᓴᖅᓯᐅᕆᓂᕐᒥᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᑦ ᐱᔭᕆᐊᖃᕐᓂᖏᓐᓂ ᑕᒪᐃᑎᒍᑦ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓂᖓᓂ, ᐅᕝᕙᓘᓐᓃᑦ ᐱᔪᓐᓇᖅᑎᑕᐅᔪᓐᓇᕐᓂᖏᓐᓂ ᐃᖏᕐᕋᓯᓂᕐᒧᑦ ᐊᒻᒪᓗ ᐱᓂᕐᒧᑦ ᐱᔭᕆᐊᓕᖏᓐᓂ ᐸᐃᐹᑦ ᐱᓕᕆᒋᐊᕈᓐᓇᐅᑎᓂᑦ ᐊᒻᒪᓗ ᐊᖏᖅᑕᐅᓂᕐᒥᑦ ᖃᐅᔨᓴᐃᓂᖃᒃᑲᓐᓂᖏᓪᓗᑎᒃ. ᒃᑭᖅᑐᒥᒃ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓂᖓᓂ ᐱᔭᕆᐊᖃᑐᐃᓐᓇᕆᐊᖃᖅᐳᖅ ᐱᓕᕆᐊᒃᓴᐅᔪᓄᑦ ᐊᑐᖅᑐᓂᒃ ᖃᐅᔨᓴᖅᑕᐅᓯᒪᙱᑦᑐᓂ ᓄᑖᙳᖅᐸᓪᓕᐊᓂᐅᔪᓄᑦ, ᐊᖏᐸᓗᒃᑐᒥ ᐃᓄᓕᒫᓄᑦ ᐃᓱᒫᓘᑕᐅᔪᓂᒃ ᐱᑕᖃᖅᑐᓂᑦ, ᐅᕝᕙᓘᓐᓃᑦ ᐊᖏᔪᓄᑦ ᐱᕙᓪᓕᐊᑎᑕᐅᓂᕐᓄᑦ ᐱᓕᕆᐊᒃᓴᐅᔪᓄᑦ ᐱᑕᖃᑐᐃᓐᓇᕆᐊᓕᖕᓄᑦ ᐊᖏᐸᓗᒃᑐᒥ ᐊᒃᑐᐃᓂᖃᕈᓐᓇᖅᑐᓂ ᐊᕙᑎᒧᑦ. ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᐃᓱᒪᓕᐅᕆᓂᕐᓄᑦ ᐅᓂᒃᑳᓕᐊᑦ ᑐᓂᔭᐅᕙᒃᐳᑦ ᑕᐃᑯᖓᑲᐅᑎᒋ ᒐᕙᒪᒃᑯᓐᓄᑦ ᒥᓂᔅᑕᐅᔪᓄᑦ ᑲᒪᒋᔭᖃᖅᑐᓄᑦ ᐱᔪᓐᓇᕐᓂᖅᑖᑎᑕᐅᓯᒪᓂᓖᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᒧᑦ (ᓲᕐᓗ ᑲᒪᒋᔭᓖᑦ ᒥᓂᔅᑕᐃᑦ) ᐊᒻᒪᓗ ᐃᓚᖃᖅᖢᑎᒃ ᐅᓂᒃᑳᕆᓯᒪᑦᑎᐊᖅᑐᓂ ᖃᐅᔨᓴᖅᑕᐅᓂᖓᓄᑦ ᑐᒃᓯᕋᐅᑎᐅᔪᒥᑦ ᐊᒻᒪᓗ ᐱᑕᖃᑐᐃᓐᓇᕆᐊᖃᕐᓂᖓᓂ ᐱᑎᑦᑎᓂᕐᒧᑦ ᐆᒪᔪᐃᑦ ᓇᔪᒐᖃᕐᕕᖏᑦᑕ ᐊᒻᒪᓗ ᐃᓅᖃᑎᒌᒃᑐᓂᑦ ᑮᓇᐅᔭᓕᐅᕈᑕᐅᓇᔭᖅᑐᓄᒃ ᐊᒃᑐᐃᓂᐅᔪᓂᑦ ᐊᕙᑎᒧᑦ ᐊᒻᒪᓗ ᓄᓇᓕᖕᓄᑦ. ᖃᐅᔨᓴᖅᑕᐅᓂᖃᕆᐊᖃᕈᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᐱᔪᓐᓇᕐᓂᖅᑖᑎᑕᐅᓯᒪᓂᓖᑦ ᐱᓕᕆᔨᐅᔪᑦ ᐱᑎᑦᑎᔭᕆᐊᖃᙱᓚᑦ ᓚᐃᓴᓐᓯᓂᒃ, ᐸᐃᐹᑦ ᐱᓕᕆᒋᐊᕈᓐᓇᐅᑎᓂᑦ ᐊᒻᒪᓗ ᐊᖏᖅᑕᐅᓂᕐᒥᑦ ᐱᓕᕆᐊᒃᓴᒧᑦ ᑭᓯᐊᓂ ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓ ᐱᔭᕇᖅᑕᐅᒃᐸᑦ.

ᖃᐅᔨᓴᖅᑕᐅᓂᖃᕆᐊᖃᕈᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᑲᒪᓂᐊᖅᑐᑦ ᐊᑎᓕᐅᕆᔭᕆᐊᖃᖅᐳᑦ ᐃᓚᒋᔭᐅᓂᐅᔪᒥᒃ ᐊᒻᒪᓗ ᐱᔭᕇᖅᓯᓗᑎᒃ ᖃᕋᓴᐅᔭᑎᒍᑦ ᑐᒃᓯᕋᐅᑎᒥᒃ ᐅᕘᓇ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ ᖃᕋᓴᐅᔭᑎᒍᑦ ᐃᓄᓕᒫᓄᑦ ᐊᑎᓕᐅᖅᑕᐅᕕᖕᒥ ᐅᕙᓂ www.nirb.ca. ᐱᔭᐅᓚᐅᖅᑎᓪᓗᒍ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᖏᓐᓂᑦ, ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᑦᑕ ᖃᐅᔨᓴᖅᑕᐅᓂᖓᓄᑦ ᐱᓕᕆᔾᔪᓯᖓ ᐊᑯᓂᐅᑎᒋᔪᓐᓇᖅᐳᑦ ᐅᓪᓗᓄᑦ 45−ᓄᑦ ᐱᔭᕇᖅᓯᓂᖏᓐᓂ ᐊᒻᒪᓗ ᐃᓚᖃᖅᐳᖅ ᐃᓄᓕᒫᓄᑦ ᐅᖃᐅᓯᒃᓴᓕᐅᕐᓂᕐᒧᑦ ᐱᕕᒃᓴᖃᕐᓂᐅᔪᒥᑦ. ᐊᑭᓖᓂᖃᙱᓚᖅ ᐃᓚᒋᔭᐅᔪᒥ ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᐱᓕᕆᔾᔪᓯᖓᓐᓂ, ᑭᓯᐊᓂ ᑲᒪᓂᐊᖅᑐᑦ ᑲᒪᒋᔭᖃᕆᐊᖃᖅᐳᑦ ᓇᓗᓇᐃᖅᓯᓂᖏᓐᓂ ᑕᒪᒃᑭᑦ ᐱᔭᕆᐊᓖᑦ ᐅᖃᐅᓯᒃᓴᖏᑦ ᑐᓂᔭᐅᓯᒪᓂᖏᓐᓂ, ᐃᓚᖃᕐᓗᓂ ᑐᑭᓕᐊᕆᓯᒪᔪᓂ ᓱᓇᒃᑯᑖᓂᒃ ᐃᓄᒃᑎᑐᑦ ᐊᒻᒪᓗ/ᐅᕝᕙᓘᓐᓃᑦ ᐃᓄᐃᓐᓇᖅᑐᓐ. ᐱᔭᕇᖅᓯᒪᑦᑎᐊᖅᑐᒥ ᐊᒻᒪᓗ ᓈᒻᒪᒃᑐᒥ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ ᑭᒡᓕᖃᖅᑎᑦᑎᓂᐊᖅᐳᖅ ᖄᒃᑲᓐᓂᐊᒍᑦ ᐅᖃᐅᓯᒃᓴᓂᒃ ᑐᒃᓯᕋᕐᓂᐅᔪᓄᑦ.