ᑕᒪᒃᑭᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᐅᔪᑦ ᐱᔭᕆᐊᖃᙱᓚᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ. ᐅᕘᓇ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᒧᑦ ᖃᐅᔨᓴᖅᑕᐅᓂᖓᓄᑦ ᒪᓕᒐᕐᒥᑦ, ᑐᒃᓯᕋᐅᑕᐅᔪᑦ ᑕᒪᒃᑭᓄᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᓄᑦ ᑐᓂᔭᐅᔭᕆᐊᖃᖅᐳᑦ ᑲᒪᓂᐊᖅᑐᑦ ᐱᓕᕆᐊᒃᓴᓂ ᑐᓂᓯᔭᕆᐊᖃᖅᐳᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᖏᓐᓄᑦ, ᐊᒻᒪᓗ ᐃᓱᒪᓕᐅᕆᓂᕐᒧᑦ ᐱᓕᕆᐊᒃᓴᐅᔪᖅ ᒪᓕᑦᑎᐊᕋᓗᐊᕐᒪᖔᑦ ᐱᔭᕆᐊᖃᖅᑐᓂ ᓇᓕᐊᑐᐃᓐᓇᓄᑦ ᐊᖏᖅᑕᐅᓯᒪᔪᓄᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᑦ ᓇᓗᓇᐃᖅᓯᕗᑦ ᐱᓕᕆᐊᒃᓴᒧᑦ ᖃᓄᐃᑦᑑᓂᖓᓂ ᐱᙱᑎᑕᐅᒍᓂ ᐱᔭᕆᐊᖃᕐᓂᐅᔪᓄᑦ ᖃᐅᔨᓴᖅᑕᐅᓂᖓᓄᑦ. ᐊᑐᖅᑕᐅᔪᒃᓴᑦ 12-1 ᓄᓇᕗᒻᒥ ᐊᖏᕈᑎᖓ ᐋᖅᑭᒃᓯᓯᒪᕗᖅ ᖃᔅᓯᒐᓚᖕᓂ ᐊᔾᔨᒌᙱᑦᑐᓂᑦ ᐱᓕᕆᐊᒃᓴᓄᑦ ᖃᓄᐃᑦᑑᓂᖏᓐᓂ ᐊᑦᑎᒃᑐᒥ ᐱᑕᖃᑐᐃᓐᓇᕆᐊᓕᖕᓂ ᐊᖏᔪᒥᒃ ᐊᒃᑐᐃᓂᖃᕈᓐᓇᖅᑐᒥᒃ ᐊᕙᑎᐅᔪᒥᑦ ᐱᙱᑎᑕᐅᒍᑎᖃᒐᔪᒃᑐᓂ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᑖᒃᑯᐊ ᐱᓕᕆᒃᓴᐅᔪᓄᑦ ᖃᓄᐃᑦᑑᓂᖏᓐᓂ ᐃᓚᖃᖅᐳᑦ ᐊᒥᓱᓂ ᖃᓄᐃᓕᐅᕐᓂᐅᔪᓂᑦ ᕼᐋᒻᓚᐅᔪᓂᑦ, ᐳᓚᕋᖅᑐᓕᕆᓂᕐᓄᑦ ᐃᒡᓗᕐᔪᐊᓂᑦ ᐅᓄᙱᓐᓂᖅᓴᐅᔪᓂᒃ 20−ᓂᒃ ᐃᒡᓕᓕᖕᓄᑦ ᕼᐋᒻᓚᐅᔪᑦ ᓯᓚᑖᓂ, ᐊᒻᒪᓗ ᐊᓯᖏᓐᓂ ᒥᑭᑦᑑᑕᐅᔪᓂᑦ ᐱᓕᕆᐊᒃᓴᐅᔪᓂᑦ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᔪᓐᓇᕐᓂᖃᕆᕗᑦ ᐃᓯᖃᑎᖃᕐᓂᕐᒧᑦ ᐊᖏᕈᑎᓂᑦ ᑲᒪᒋᔭᖃᖅᑐᓄᑦ ᒐᕙᒪᒃᑯᓐᓂ ᒥᓂᔅᑕᐅᔪᓂᑦ ᓱᓕᒃᑲᓐᓂᖅ ᐱᙱᑎᑕᐅᒍᓂᕐᒧᑦ ᖄᒃᑲᓐᓂᐊᒍᑦ ᐱᓕᕆᐊᒃᓴᒧᑦ ᐊᕕᒃᑐᖅᓯᒪᓂᐅᔪᓄᑦ ᐅᕝᕙᓘᓐᓃᑦ ᖃᓄᐃᓕᐅᕐᓂᐅᔪᓄᑦ ᐱᔭᕆᐊᖃᕐᓂᐅᔪᓄᑦ ᖃᐅᔨᓴᖅᑕᐅᓂᖓᓄᑦ. ᑕᐃᒪᐃᑦᑐᓇᕋᔭᖅᐳᖅ ᐱᓕᕆᐊᒃᓴᐅᑉ ᖃᓄᐃᑦᑑᓂᖓᓂ ᐊᑦᑎᒃᑐᒥᒃ ᐱᑕᖃᑐᐃᓐᓇᕆᐊᖃᕐᓂᖓᓂ ᐊᖏᔪᒥᒃ ᐊᒃᑐᐃᓂᕐᒧᑦ ᐊᕙᑎᒥᒃ ᐊᒻᒪᓗ ᐊᔾᔨᐸᓗᐊᓂ ᐱᓕᕆᔾᔪᓯᐅᔪᒥᒃ ᐃᓕᓯᒪᔪᖃᖅᐸᒌᕐᓂᖓᓂ ᓇᓗᓇᐃᖅᓯᓂᕐᒧᑦ ᐊᕙᑎᓕᕆᓂᕐᒧᑦ ᐊᒃᑐᐃᓂᐅᔪᑦ ᓈᒻᒪᒃᑐᒥ ᑭᐅᔭᐅᓯᒪᓂᖏᓐᓂ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᒫᓐᓇᐅᔪᒥᒃ ᐱᖓᓱᓂᒃ ᖃᐅᔨᓴᖅᑕᐅᓂᖓᓄᑦ ᐱᔪᓐᓇᖅᑎᑦᑎᓯᒪᔪᓂᒃ ᐊᖏᕈᑎᖃᖅᐳᑦ ᐅᕘᓇ ᐊᑐᖅᑕᐅᔪᒃᓴᑦ 12-1(7)−ᒥ ᓄᓇᕗᒻᒥ ᐊᖏᕈᑎᒥᑦ ᐊᒻᒪᓗ ᐊᑐᖅᑕᐅᔪᒃᓴᑦ 3−ᒥ ᓄᓇᕗᒻᒥ ᐸᕐᓇᐃᓂᕐᒧᑦ ᐊᒻᒪ ᐱᓕᕆᐊᒃᓴᒧᑦ ᖃᐅᔨᓴᖅᑕᐅᓂᖓᓄᑦ ᒪᓕᒐᕐᒥᑦ:

ᐊᑐᓂ ᖃᐅᔨᓴᖅᑕᐅᓂᖓᓄᑦ ᐱᔪᓐᓇᖅᑎᑦᑎᓯᒪᔪᖅ ᐊᖏᕈᑎᐅᔪᑦ ᐱᖃᕆᐊᖃᖅᐳᑦ ᐊᕐᕌᒍᑕᒫᒥ ᓇᐃᒡᓕᒋᐊᖅᓯᒪᔪᒥ ᐅᓂᒃᑳᕆᓂᕐᒥᑦ ᓚᐃᓴᓐᓯᓂᑦ, ᐸᐃᐹᑦ ᐱᓕᕆᒋᐊᕈᓐᓇᐅᑎᓂᑦ ᐊᒻᒪᓗ ᐊᖏᖅᑕᐅᓂᐅᔪᓂᑦ ᑐᓂᔭᐅᔪᓂᑦ ᐊᒻᒪᓗ ᐅᐸᒃᑕᐅᒃᑲᓐᓂᕈᓐᓇᖅᐳᑦ ᖃᖓᑐᐃᓐᓇᑦᑎᐊᖅ ᐱᔭᕆᐊᖃᕌᖓᑦ.

ᐊᔾᔨᖃᙱᑦᑐᒻᒪᕆᐅᔪᓄᑦ ᖃᓄᐃᓐᓂᐅᔪᓄᑦ, ᐱᓕᕆᐊᒃᓴᐅᔪᒧᑦ ᖃᓄᐃᑦᑑᓂᖓᓂ ᐱᙱᑎᑕᐅᒍᓂ ᐱᔭᕆᐊᖃᕐᓂᐅᔪᒧᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔩᑦ ᑲᔪᓯᑎᑦᑎᕗᑦ ᐱᔪᓐᓇᕐᓂᐅᔪᒥᒃ ᑐᓂᓯᓂᕐᒧᑦ ᑕᐃᒪᐃᑦᑐᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᓂᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᓄᓇᕗᒻᒥ ᐸᕐᓇᐃᓂᕐᒧᑦ ᑲᑎᒪᔨᑦ ᓇᓗᓇᐃᖅᑕᐅᓯᒪᔪᒥᒃ ᐃᓱᒫᓘᑎᖃᕈᑎᒃ ᐱᑕᖃᑐᐃᓐᓇᕆᐊᓕᖕᓄᑦ ᑲᑎᓕᒫᖅᖢᒋᑦ ᐊᒃᑐᐃᓂᐅᔪᓐᓇᖅᑐᓂ ᓴᖅᑭᑦᑐᓐᓇᖅᑐᓂᑦ.