ᐃᓄᓕᒫᓄᑦ ᐃᓚᐅᖃᑕᐅᓂᖅ ᐊᑑᑎᖃᓛᖑᓪᓗᓂ ᐱᓕᕆᓂᐅᕗᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐅᔾᔨᕈᓱᓕᕈᓐᓇᕐᓂᖏᓐᓂ ᐱᐅᓂᐅᔪᓄᑦ ᐊᒃᑐᐃᓂᐅᔪᓄᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᒧᑦ. ᐊᑑᑎᖃᑦᑎᐊᖅᑐᒥ ᐃᓚᐅᖃᑕᐅᓂᕐᒥᑦ ᐱᔪᓐᓇᖅᑎᑦᑎᕗᖅ ᒪᑐᐃᖓᔪᒥᒃ ᐊᒻᒪᓗ ᓇᓕᒧᒌᑦᑎᐊᖅᑐᒥ ᐱᓕᕆᔾᔪᓯᐅᔪᒥᒃ ᓴᙱᒃᑎᒋᐊᖅᓯᔪᒥᒃ ᐱᐅᓂᖓᓂ ᐊᒃᑐᐃᓂᕐᒧᑦ ᖃᐅᔨᓴᐃᓂᐅᔪᒥᒃ ᐊᒻᒪᓗ ᐅᖃᐅᔾᔨᓪᓗᓂ ᐃᓱᒪᓕᐅᕆᓂᕐᒥᑦ, ᐱᑎᑦᑎᔪᒥᒃ ᐱᐅᓂᖅᓴᐅᔪᓂᒃ ᐃᓱᒪᓕᐅᕆᓂᐅᔪᓂᒃ ᐊᒻᒪᓗ ᐱᐅᓂᖅᓴᓂᒃ ᐱᓕᕆᐊᒃᓴᐅᔪᓂᑦ. ᖃᐅᔨᓴᖅᑕᐅᓂᖓᓄᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᒥᒃ ᐃᓱᒪᓕᐅᕆᓂᕐᒧᑦ ᐱᔭᕆᐊᖃᕐᒪᖔᑦ ᑕᒪᒃᑮᔪᒥᒃ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓂᖓᓂ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᕆᔭᕆᐊᖃᕆᕗᑦ ᐱᓕᕆᐊᒃᓴᐅᔪᖅ ᐱᑎᑦᑎᓂᐊᕐᒪᖔᑦ ᐃᓄᓕᒫᓄᑦ ᐃᓱᒫᓘᑎᓪᓗᐊᑕᓂᑦ, ᑕᒪᓐᓇ ᐃᓱᒪᓕᐊᖑᕗᖅ, ᐃᓚᖓᒍᑦ, ᑭᐅᔾᔪᑕᐅᔪᓂᒃ ᐱᔭᐅᔪᓂᑦ ᑕᐃᑲᓂ ᖃᐅᔨᓴᖅᑕᐅᓂᖓᓄᑦ ᐱᓕᕆᔾᔪᓯᐅᔪᒥᑦ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᒋᔭᖃᓲᖑᕗᑦ ᐱᑕᖃᑐᐃᓐᓇᕆᐊᓕᖕᓂ ᐆᒪᔪᐃᑦ ᓇᔪᒐᖃᕐᕕᖏᑦᑕ ᐊᒃᑐᐃᓂᐅᔪᓐᓇᖅᑐᓂ (ᓲᕐᓗ, ᓄᓇᒥᒃ, ᓯᓚᒥᒃ, ᐃᒪᕐᒥᒃ, ᐃᖃᓗᖕᓄᑦ ᐊᒻᒪᓗ ᐆᒪᔪᓄᑦ) ᐊᒻᒪᓗ ᐱᑕᖃᑐᐃᓐᓇᕆᐊᓕᖕᓂ ᐃᓅᖃᑎᒌᒃᑐᓂᑦ ᑮᓇᐅᔭᓕᐅᕈᑕᐅᓇᔭᖅᑐᓂ ᐊᒃᑐᐃᓂᐅᔪᓐᓇᖅᑐᓄᑦ (ᓲᕐᓗ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᖃᓄᐃᙱᑦᑎᐊᕐᓂᐅᔪᒧᑦ ᐃᓄᖕᓂ ᐊᒻᒪᓗ ᓄᓇᓕᖕᓂ) ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᐅᔪᓄᑦ ᐃᓱᒪᓕᐅᕆᓂᕐᓄᑦ ᐱᓕᕆᐊᒃᓴᐅᔪᖅ ᐱᑕᖃᑐᐃᓐᓇᕆᐊᖃᕐᓂᖓᓂ ᐊᖏᐸᓗᒃᑐᒥ ᐊᒃᑐᐃᓂᖃᕐᓂᖓᓂ ᐊᕙᑎᐅᔪᒥᑦ. ᐅᖃᐅᓯᒃᓴᑎᑦ ᐊᑑᑎᖃᓛᖑᓂᖏᓐᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᓇᓗᓇᐃᖅᓯᔭᕆᐊᖃᕐᓂᐊᖅᐳᑎᑦ ᑕᒪᒃᑭᓂᑦ ᐆᒪᔪᐃᑦ ᓇᔪᒐᖃᕐᕕᖏᑦᑕ ᐊᒻᒪᓗ ᐃᓅᖃᑎᒌᒃᑐᓂᑦ ᑮᓇᐅᔭᓕᐅᕈᑕᐅᓇᔭᖅᑐᓂ ᐱᐅᓂᖏᓐᓂ ᐃᓱᒪᒋᔭᑎᑦ ᐱᒻᒪᕆᐅᓂᖏᓐᓂ ᐊᒻᒪᓗ ᐅᓂᒃᑳᕆᓗᑎᑦ ᖃᓄᖅ ᑖᒃᑯᐊ ᐱᐅᓂᐅᔪᑦ ᐊᒃᑐᖅᑕᐅᓇᔭᕐᓂᖏᓐᓂ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᐅᔪᒧᑦ.


ᖃᓄᖅ ᐅᖃᐅᓯᒃᓴᐅᔪᑦ ᐃᓱᒪᒋᔭᐅᓇᔭᖅᐸᑦ ᖃᐅᔨᐃᓂᐅᔪᒥᑦ?

ᐅᖃᐅᓯᒃᓴᑐᐃᓐᓇᐃᑦ ᐅᖃᐅᓯᐅᔪᓄᑦ ᐱᔪᒪᓂᖃᖅᑐᓄᑦ ᐱᓕᕆᖃᑎᒋᔭᐅᔪᓂ ᐊᒻᒪᓗ ᐃᓄᓕᒫᓄᑦ ᑐᓂᔭᐅᓂᐊᖅᐳᑦ ᑕᒪᒃᑮᔪᒥᒃ ᐊᒻᒪᓗ ᓈᒻᒪᑦᑎᐊᖅᑐᒥ ᐃᓱᒪᒃᓴᖅᓯᐅᕆᓂᕐᓂ ᖃᐅᔨᓴᐃᓂᐅᔪᒥᑦ ᐱᓕᕆᐊᖑᔪᒥᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᒃᑯᖏᓐᓂ. ᑕᒪᓐᓇ ᑐᑭᖃᖅᐳᖅ ᐃᓚᔭᐅᓂᐊᕐᓂᖓᓐᓂ, ᐊᒻᒪᓗ ᕿᒥᕐᕈᐊᖅᑕᐅᖃᓯᐅᑎᓗᓂ ᐊᓯᖏᓐᓂ ᑕᐅᑐᒃᑕᐅᓂᐅᔪᓄᑦ ᐊᒻᒪᓗ ᐅᖃᐅᓯᒃᓴᓂ ᐱᔭᐅᔪᓂᑦ ᑕᐃᑲᓂ ᖃᐅᔨᓴᐃᓂᐅᔪᒥᑦ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᑐᓲᖑᕗᑦ ᐊᔾᔨᒌᙱᕈᓘᔭᖅᑎᓄᑦ ᐱᓕᕆᔾᔪᑎᓂᑦ ᐃᓱᒪᒃᓴᖅᓯᐅᕆᓂᕐᓄᑦ ᐊᑑᑎᖃᕐᓂᖓᓂ, ᐅᖁᒪᐃᓐᓂᖓᓂ ᐊᒻᒪᓗ ᐊᑑᑎᖃᕐᓂᖓᓂ ᐅᖃᐅᓯᒃᓴᓂ ᑐᓂᔭᐅᔪᓄᑦ. ᐅᖃᐅᓯᒃᓴᐃᑦ ᑲᑎᖅᓱᖅᑕᐅᔪᑦ ᖃᐅᔨᓴᐃᓂᐅᔪᒥᑦ ᓴᖑᑎᑦᑎᔪᓐᓇᖅᐳᑦ ᖃᐅᔨᓴᐃᓂᐅᔪᖅ ᑕᐅᑐᒃᑕᑐᐊᖃᑲᐃᓐᓇᕐᓂᖓᓂ ᐊᒻᒪᓗ ᖃᓄᐃᓕᖓᓂᖓ ᐃᓱᒪᓕᐅᕆᓂᖓᓂ ᐊᒻᒪᓗ ᐃᓚᒋᔭᖓᓐᓂ ᐊᑐᓕᖁᔭᐅᔪᓂᑦ ᑐᓂᔭᐅᔪᓂᑦ ᐃᓱᖓᓐᓂ ᖃᐅᔨᓴᐃᓂᐅᔪᒥᑦ.

ᐃᓄᓕᒫᓄᑦ ᑲᑎᒪᑎᑦᑎᓂᕐᓂ

ᖄᒃᑲᓐᓂᐊᒍᑦ ᐱᕕᒃᓴᖃᕐᓂᐅᔪᒥᑦ ᑐᓂᓯᓂᕐᒧᑦ ᑎᑎᕋᖅᓯᒪᔪᓂ ᐅᖃᐅᓯᒃᓴᓂᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐃᓱᒪᒃᓴᖅᓯᐅᕈᑎᒃᓴᖏᓐᓄᑦ, ᑕᐃᑲᓂᓗᒃᑖᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᕿᒥᕐᕈᓂᖓᓐᓂ ᐊᒻᒪᓗ ᐃᖏᕐᕋᐃᓐᓇᖅᑐᓂ ᐅᔾᔨᖅᓴᐃᓂᕐᓄᑦ ᐱᓕᕆᐊᖑᔪᓂᑦ ᐊᒥᓱᓂᒃ ᐱᕕᒃᓴᖅᑕᖃᖅᐳᖅ ᐅᐸᒃᓯᒪᓗᑎᒃ ᐃᓚᐅᖃᑕᐅᓂᕐᓄᑦ ᐅᕘᓇ ᐃᓄᓕᒫᓄᑦ ᑲᑎᒪᑎᑦᑎᓂᕐᓂᑦ, ᐅᖃᐅᓯᒃᓴᓕᐊᓄᑦ ᐱᓕᕆᓂᐅᔪᓄᑦ, ᓄᓇᓕᖕᓂ ᑲᑎᒪᓂᐅᔪᓂᑦ, ᐃᓕᓐᓂᐊᕐᓂᓂᑦ ᐊᒻᒪᓗ ᐃᓄᓕᒫᓄᑦ ᑐᓵᑎᑦᑎᓂᐅᔪᓂᑦ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᑎᑦᑎᒐᔪᒃᐳᑦ ᑕᐃᒪᐃᑦᑐᓂᒃ ᖃᓄᐃᓐᓂᐅᔪᓂᑦ ᓄᓇᓕᖕᓂ ᐱᑕᖃᑐᐃᓐᓇᕆᐊᓕᖕᓂ−ᐊᒃᑐᖅᑕᐅᓂᕐᒧᑦ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᒧᑦ ᐊᒻᒪᓗ ᐊᔭᐅᕆᓪᓗᑎᒃ ᐃᓄᓕᒫᓂᑦ ᐅᐸᖕᓂᕐᒧᑦ ᐊᒻᒪᓗ ᐃᓚᐅᖃᑕᐅᓂᕐᒧᑦ. ᑕᒪᕐᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᓂᐅᔪᑦ ᐅᖃᐅᓯᐅᕙᒃᐳᑦ ᓯᕗᓂᕐᔪᐊᖓᓂ ᐊᒻᒪᓗ ᑐᓂᓯᓪᓗᑎᒃ ᑐᓵᔨᖃᑲᐅᑎᒋᓂᖏᓐᓂᑦ ᓇᓗᓇᐃᖅᓯᓂᕐᒧᑦ ᑭᒃᑯᓕᒫᑦ ᑐᓴᖅᑕᐅᔪᓐᓇᕐᓂᖏᓐᓂ ᐊᒻᒪᓗ ᑐᑭᓯᔭᐅᓗᑎᒃ.