2017-18 ᑮᓇᐅᔭᓕᕆᓐᓇᐅᑉ ᐊᕐᕌᒍᖓᓂ ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (NIRB) ᐱᖓᔪᒋᔭᖓᓐᓂᒃ ᐋᖅᑭᒃᓱᖅᓯᒪᔭᒥᓂᒃ ᓇᐃᒡᓕᒋᐊᖅᓯᒪᔪᒥᒃ ᐊᕐᕌᒍᓄᑦ ᑕᓪᓕᒪᓄᑦ ᓯᕗᓂᒃᓴᒧᑦ ᐸᕐᓇᐅᒻᒥᒃ, ᐊᑐᓕᖅᑎᑕᐅᓚᐅᖅᓯᒪᔪᖅ ᐊᐃᕆᓕ 1, 2018ᖑᑎᓪᓗᒍ ᐅᖃᐅᓯᖃᕐᒥᔪᖅᑕᐅᖅ ᐊᐅᓚᑦᓯᓂᐅᔪᔪᓄᑦ 2018-ᒥᑦ 2022-ᒧᑦ. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᑦ ᓯᕗᓂᒃᓴᒧᑦ ᐸᕐᓇᐅᓯᐊᖓᑦ ᑕᒪᐃᓐᓅᓕᖓᔪᓂᒃ ᑕᑯᒃᓴᐅᑎᑦᓯᓯᒪᖕᒥᖅᑕᐅᖅ ᐱᓇᓱᐊᒐᖃᖅᑎᑕᐅᓯᒪᓂᕆᔭᖏᓐᓅᖓᔪᓂᒃᑕᐅᖅ, ᐱᓕᕆᐊᕆᓂᐊᖅᑕᐃᓂᒡᓗ, ᑐᕌᕐᕕᒋᔪᒪᔭᖏᓐᓅᖓᓪᓗᑎᒃ, ᐊᑲᐅᓯᕆᐊᕈᑕᐅᔪᓐᓇᖅᑐᓂᒡᓗ ᐅᕝᕙᓘᓐᓃᑦ ᐱᕙᓪᓕᐊᔭᕆᐊᖃᖅᑕᖏᓐᓂᒡᓘᓐᓃᑦ ᑮᓇᐅᔭᖃᖅᑎᑕᐅᕕᐅᔭᕆᐊᖃᖅᑐᓂᒡᓗ ᐊᕐᕌᒍᓄ ᑕᓪᓕᒪᓄᑦ ᐊᑐᒐᐅᔪᓐᓇᕋᔭᖅᑐᓂᒃ.

ᐃᓄᖕᓄᑦ ᒐᕙᒪᖃᕐᕕᐅᑎᓪᓗᒍ ᓄᓇᕗᒥ ᐊᖏᕈᑎᒃᑯᑦ, ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᔾᔨᖃᖏᓚᖅ ᐱᓇᓱᐊᒐᖃᖅᑎᑕᐅᓯᒪᔭᕆᔭᒥᓂᒃ ᐱᓕᕆᐊᕆᔭᕆᐊᖃᖅᑕᖃᖅᓱᓂ. ᑖᓐᓇ ᐸᕐᓇᐅᑦ ᑐᕌᕐᕕᒋᓗᐊᕈᒪᔭᖏᓐᓂᒃ ᐱᑕᖃᖅᑐᖅ ᐊᕐᕌᒍᓄᑦ ᑕᓪᓕᒪᓄᑦ ᐊᒻᒪᓗ ᐊᕐᕌᒍ ᑕᒫᖅᓯᐅᑎᖏᓐᓅᖓᔪᓅᖓᓪᓯᒪᓪᓗᓂ ᐅᓪᓗᒥᒨᓕᖅᑐᖅᑕᐅᓯᒪᖃᑦᑕᕆᐊᖃᓲᓂᒃ ᐊᒻᒪᓄᓗ ᓱᓕᕆᕙᓪᓕᐊᔭᕿᐊᖏᓐᓂᒡᓗ ᑐᓴᒐᒃᑕᐅᑎᑕᖃᐃᓐᓴᖅᓱᓂᓗ ᐃᓄᖕᓄᑦ ᑐᓴᐅᒪᔭᐅᖃᑦᑕᕈᓐᓴᖅᑐᓂᒃ ᐊᕐᕌᒍ ᑕᒫᖅᓯᐅᑎᖏᑦᑎᒍᑦ ᐊᒻᒪᓗ ᑮᓇᐅᔭᐃᑦ ᓈᓴᐃᔨᓄᑦ ᓈᓴᖅᑕᐅᓯᒪᔪᓂᒃ ᐃᓚᖃᖅᓱᑎᒃ.

ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ 2018-2022 ᐊᕐᕌᒍᓄᑦ ᑕᓪᓕᒪᓄᑦ ᓯᕗᓂᒃᓴᒧᑦ ᐸᕐᓇᐅᒻᒥ ᐱᑕᖃᖅᑐᖅ 6-ᓂᒃ ᑐᕌᕐᕕᒋᔪᒪᔭᖏᓐᓂᒃ ᓯᕗᓂᒃᓴᒧᑦ ᑐᕌᖓᓪᓗᑎᒃ:

  1. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᒪᓖᓐᓇᕐᓂᐊᖅᑐᑦ ᐱᓇᓱᐊᒐᕆᔭᐅᖃᖅᑎᒋᔭᒥᓅᖓᔪᓂᒃ ᓄᓇᕘᒥ ᐊᖏᕈᑎᓃᑦᑐᑦ ᒪᓕᒡᓗᒋᑦ.
  2. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᒃᑐᖅᑕᐅᓯᒪᖃᓯᐅᔾᔭᑐᐃᓐᓇᕆᐊᖃᖅᑐᓂᒃ ᖃᐅᔨᓴᑦᓯᐊᖏᓐᓇᖃᑦᑕᕐᓂᐊᖅᑐᑦ.
  3. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓯᕗᓂᒃᓴᑯᑖᒧᓪᓗ ᐊᐅᓚᑦᓰᓐᓇᖃᑦᑕᕐᓂᐊᖅᑐᑦ ᐊᒡᓚᒡᕕᖕᒥᓂ.
  4. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓴᖅᑭᔮᖅᑎᑦᓯᖃᑦᑕᕐᓂᐊᕆᓪᓗᑎᒡᓗ ᐃᓄᐃᑦ ᖃᐅᔨᒪᔭᑐᖃᖏᓐᓅᖓᔪᓂᒃ/ᖃᐅᔨᒪᔭᖏᓐᓂᒡᓗ ᐱᓕᕆᐊᖃᕐᓂᒥᓂ.
  5. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓴᖅᑭᔮᖅᑎᑦᓯᖃᑦᑕᕐᓂᐊᕆᓪᓗᑎᒃᑕᐅᖅ ᐃᓄᖕᓂᒃ ᓈᓚᖃᑦᑕᕐᓂᕐᒥᒃ ᐃᓚᐅᑎᑦᓯᖃᑦᑕᓂᒃᑯᓪᓗ ᓄᓇᕗᒥ ᒪᓕᒐᑦᑎᓅᖓᔪᒃᑯᑦ ᐃᓄᖕᓂᒃ ᑲᑎᒪᑎᑦᓯᒃᑲᐃᖃᑦᑕᕐᓂᒃᑯᑦ ᓈᓚᒃᑎᑦᓯᒃᑲᐃᖃᑦᑕᕐᓂᒃᑯᓪᓗ.
  6. ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐅᖃᖃᑎᖃᖃᑦᑕᕐᓂᐊᖅᑐᑦ ᖃᓄᖅ ᐊᐅᓚᑕᐅᔭᕆᐊᖃᕐᓂᖏᓐᓂᒃ ᑕᕆᐅᒥ ᐃᒪᓕᕆᓂᕐᒨᖓᔪᓂᒃ.

ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ 2018-2022 ᐊᕐᕌᒍᓄᑦ ᑕᓪᓕᒪᓄᑦ ᓯᕗᓂᒃᓴᒧᑦ ᐸᕐᓇᐅᑎᖓᑦ ᐅᐃᕕᑎᑐᑦ, ᖃᓪᓗᓈᑎᑐᑦ ᐃᓄᒃᑎᑐᑦ ᐃᓄᐃᓐᓇᖅᑎᑐᓪᓗ ᐊᑐᐃᓐᓇᐅᔪᖅ :

Inuktitut Strategic Plan English Strategic Plan French Strategic Plan