ᐱᔭᕇᓚᐅᖅᑎᓪᓗᒋᑦ ᖃᐅᔨᓴᖅᑕᐅᓂᖓᓄᑦ ᖃᐅᔨᓴᐃᓂᐅᔪᓂᑦ ᐱᓕᕆᐊᒃᓴᕆᔭᕐᓄᑦ ᑐᒃᓯᕋᐅᑕᐅᔪᒥᒃ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓂᓯᓂᐊᖅᐳᑦ ᖃᐅᔨᓴᖅᑕᐅᓂᖓᓄᑦ ᐃᓱᒪᓕᐅᕆᓂᕐᒥᑦ ᐅᓂᒃᑳᓕᐊᒥᑦ ᒥᓂᔅᑕᒧᑦ(ᓄᑦ) ᑲᒪᒋᔭᖃᖅᑐᓄᑦ ᐱᔪᓐᓇᕐᓂᖅᑖᑎᑕᐅᓯᒪᓂᓖᑦ ᐊᖏᕈᑕᐅᓇᓱᐊᖅᑐᒧᑦ ᖃᓄᐃᓕᐅᕐᓂᐅᔪᓄᑦ. ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᑦᑕ ᐃᓱᒪᓕᐊᕆᓂᖏᑦ ᐃᓚᖃᕐᓂᐊᖅᐳᑦ ᐃᒪᐃᖁᔨᓂᐅᔪᒥᒃ ᐱᔾᔪᑎᖃᖅᑐᒥ ᑕᒪᒃᑮᔪᒥᒃ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓂᖃᕆᐊᖃᕐᒪᖔᑦ, ᐅᕝᕙᓘᓐᓃᑦ ᐱᓕᕆᐊᒃᓴᐅᔪᖅ ᐃᖏᕐᕋᓯᔪᓐᓇᕐᓂᖓᓂ ᐊᑐᓕᖁᔭᐅᔪᓂᒃ ᐱᓕᕆᐊᒃᓴᒧᑦ−ᑐᕌᖓᔪᓂ ᑕᐃᒎᓯᓂᒃ ᐊᒻᒪᓗ ᖃᓄᐃᓕᖓᓂᐅᔪᓂᒃ. ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᐃᓱᒪᓕᐅᕆᓂᕐᓄᑦ ᐅᓂᒃᑳᓕᐊᖓ ᓴᖅᑭᑎᑕᐅᕗᖅ ᖃᕋᓴᐅᔭᑎᒍᑦ ᐃᓄᓕᒫᓄᑦ ᐊᑎᓕᐅᖅᑕᐅᕕᖓᓐᓄᑦ ᐊᒻᒪᓗ ᑐᓴᖅᑎᑕᐅᓂᖓ ᑐᓐᓂᖅᓴᖅᑕᐅᕗᖅ ᖃᕋᓴᐅᔭᑎᒍᑦ ᑎᑎᕋᕐᕕᐅᕙᒃᑐᓄᑦ ᑐᓐᓂᖅᓴᖅᑕᐅᓂᖓᓄᑦ ᑎᑎᕋᖅᓯᒪᓂᖓᓄᑦ ᖃᐅᔨᓴᐃᓂᐅᔪᒧᑦ. ᑕᒪᕐᒥᒐᓚᑦ ᐱᓕᕆᐊᒃᓴᐅᔪᒧᑦ ᑐᒃᓯᕋᐅᑕᐅᔪᑦ ᖃᐅᔨᓴᖅᑕᐅᓂᖃᓲᓂᒃ ᐊᖏᖅᑕᐅᒐᔪᒃᐳᑦ ᐃᖏᕐᕋᓯᓂᖏᓐᓄᑦ ᐊᑐᓕᖁᔭᐅᔪᓂᑦ ᑕᐃᒎᓯᓂᒃ ᐊᒻᒪᓗ ᖃᓄᐃᓕᖓᓂᐅᔪᓂᒃ, ᑕᒪᒃᑮᔪᓂᒃ ᐊᕙᑎᓕᕆᓂᕐᒧᑦ ᕿᒥᕐᕈᔭᐅᓂᖏᑦ ᓴᓂᕐᕙᒃᑕᐅᓯᒪᒐᔪᖕᒪᑕ ᐊᖏᔪᓄᑦ ᐱᕙᓪᓕᐊᑎᑕᐅᓂᖏᓐᓄᑦ ᐱᓕᕆᐊᒃᓴᐅᔪᓄᑦ, ᐱᓕᕆᐊᒃᓴᑦ ᐊᖏᐸᓗᒃᑐᒥ ᐃᓄᓕᒫᓄᑦ ᐃᓱᒫᓘᑎᓪᓗᐊᑕᓕᖕᓄᑦ ᐊᒻᒪᓗ ᐱᓕᕆᐊᒃᓴᐅᔪᑦ ᐊᑐᖅᑐᓂ ᓄᑖᙳᕆᐊᖅᑎᑕᐅᓯᒪᔪᓄᑦ ᐃᓱᒪᑐᓂᐅᔪᓄᑦ ᐊᒃᑐᐃᓂᐅᔪᑦ ᖃᐅᔨᒪᔭᐅᙱᓪᓗᑎᒃ.

ᒐᕙᒪᑐᖃᒃᑯᑦ ᐅᕝᕙᓘᓐᓃᑦ ᓄᓇᕗᒻᒥ ᒐᕙᒪᒃᑯᑦ, ᓇᓗᓇᐃᖅᑕᐅᓯᒪᔪᓂ ᐃᓄᖕᓂ ᑲᑐᔾᔨᖃᑎᒌᖑᔪᓄᑦ ᐊᒻᒪᓗ ᐊᓯᖏᓐᓂ ᐱᓕᕆᔨᐅᔪᓄᑦ ᐊᐅᓚᑦᑎᔪᓂᑦ ᐊᒻᒪᓗ ᐱᔪᓐᓇᖅᑎᑦᑎᔪᓂᒃ ᐊᖏᖅᑕᐅᓇᓱᐊᖅᑐᓄᑦ ᖃᓄᐃᓕᐅᕐᓂᐅᔪᓄᑦ ᐃᓱᒪᒋᔭᐅᕗᑦ “ᐱᔪᓐᓇᕐᓂᖅᑖᑎᑕᐅᓯᒪᓂᓖᑦ ᐱᓕᕆᔨᐅᓂᖏᓐᓂ”. ᑲᒪᒋᔭᖃᖅᑐᑦ ᒐᕙᒪᒃᑯᑦ ᒥᓂᔅᑕ(ᖏᑦ) ᑐᓂᓯᓂᐊᖅᐳᑦ ᑎᑎᕋᕐᓂᒃᑯᑦ, ᐃᓱᒪᓕᐅᕆᓂᕐᒥᑦ ᑎᑎᖅᑲᖁᑕᐅᔪᒥᒃ ᓈᒻᒪᒃᓴᖅᑐᒥ, ᐊᔾᔨᒌᙱᓐᓂᐅᔪᓂᒃ ᐅᕝᕙᓘᓐᓃᑦ ᐊᖏᙱᑦᑐᓂᑦ ᐊᑐᓕᖁᔭᐅᓯᒪᔪᓂᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ. ᐃᓱᒪᓕᐅᕆᓂᕐᒧᑦ ᑎᑎᖅᑲᖁᑖ ᑐᓂᔭᐅᒍᓂ, ᐱᔪᓐᓇᕐᓂᖅᑖᑎᑕᐅᓯᒪᓂᓖᑦ ᐱᓕᕆᔨᐅᔪᑦ ᑐᓂᓯᔪᓐᓇᖅᓯᕗᑦ ᓚᐃᓴᓐᓯᓂᒃ, ᐸᐃᐹᑦ ᐱᓕᕆᒋᐊᕈᓐᓇᐅᑎᓂᑦ ᐊᒻᒪᓗ ᐊᖏᕐᓂᐅᔪᓂᑦ ᒪᓕᒃᖢᑎᒃ ᒪᓕᒃᑕᒥᓂᑦ ᐱᓕᕆᔾᔪᓯᐅᔪᓂᑦ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᔪᙱᓐᓂᖃᖅᐳᑦ ᓴᖅᑭᑎᑦᑎᓂᕐᒧᑦ ᐅᔾᔨᖅᓴᐃᓂᐅᔪᓂ ᐱᓕᕆᐊᖑᔪᓂᑦ ᐱᓕᕆᐊᒃᓴᓄᑦ ᓇᓗᓇᐃᖅᓯᔪᓐᓇᖅᑐᓂ ᑲᒪᒋᔭᖃᕐᓂᐅᔪᓂᑦ ᑲᒪᓂᐊᖅᑐᒧᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐅᕝᕙᓘᓐᓃᑦ ᒐᕙᒪᒃᑯᓐᓄᑦ. ᐅᔾᔨᖅᓴᐃᓂᕐᒧᑦ ᐱᔭᕆᐊᖃᖅᑐᑦ ᐱᓕᕆᐊᒃᓴᓄᑦ ᐊᖏᖅᑕᐅᔪᓄᑦ ᐃᖏᕐᕋᔪᓐᓇᖅᓯᓂᖏᓐᓄᑦ ᒪᓕᒃᑐᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᐃᓚᖃᕈᓐᓇᖅᐳᑦ ᑐᓂᖅᑯᑕᐅᔪᓂᒃ ᐊᕐᕌᒍᑕᒫᑦ ᐅᓂᒃᑳᓕᐊᓂᑦ ᐅᕝᕙᓘᓐᓃᑦ ᐊᓯᖏᓐᓂ ᑭᖑᓂᐊᒍᑦ−ᖃᐅᔨᓴᐃᓂᐅᔪᓄᑦ ᑭᓱᑐᐃᓐᓇᓂᒃ.