ᐊᕙᑎᓕᕆᔨᒃᑯᑦ ᐃᖃᓇᐃᔭᖅᑎᖏᑦ ᐃᑲᔪᕈᖕᓇᕐᓂᐊᖅᑐᑦ ᐃᓕᖕᓂᒃ ᐅᖃᓘᑎᒃᑯᑦ, ᓱᒃᑲᔪᒃᑯᑦ, ᖃᕆᑕᐅᔭᒃᑯᑦ ᑎᑎᕋᕐᓗᑎᒃ, ᐊᒻᒪ ᑕᑯᓴᒥᐊᕐᓗᒋᑦ ᑎᑎᕋᕐᕕᖓᓂ ᐃᖃᓗᒃᑑᑎᐊᒻᒥ, ᓄᓇᕘᒻᒥ!

ᑐᑭᓯᔪᑎᒃᓴᓂᒃ ᕿᓂᕐᓂᕐᕈᕕᑦ ᐅᕙᓘᑉᕙ ᐅᖃᖃᑎᖃᕈᐊᕐᓂᕈᕕᑦ ᐊᐱᖅᓱᕐᓗᒋᑦ, ᐅᖃᓗᖕᓂᐊᖅᐳᑎᑦ ᑐᑭᒧᐊᒃᑎᑦᓯᔨᒧᑦ ᑐᓴᖅᐸᓕᐊᑎᑦᓯᓂᕐᒥ ᐊᕙᑎᓕᕆᔨᒃᑯᓐᓂ. ᑐᑭᒧᐊᒃᑎᑦᓯᔨ ᐅᖃᓗᒡᕕᒋᓱᐊᕐᓂᕈᖕᓂ ᑕᑯᓱᐊᕐᓂᕈᖕᓂᓗ, ᑕᑯᒋᐊᕐᓗᒋᑦ ᑭᑐᑦ ᐃᖃᓇᐃᔭᖅᑐᑦ ᐊᑎᖏᑦ ᐊᕙᑎᓕᕆᔨᒃᑯᓐᓂ.

ᑎᒃᑯᐊᖅᑕᐅᓯᒪᑉᓗᑎᒃ ᑎᒥᖑᖅᑎᑕᐅᓯᒪᖕᒪᑕ ᐊᕙᑎᓕᕆᔨᒃᑯᑦ, ᐃᓚᖏᓐᓂᒃ ᐊᔪᕈᑎᖃᖅᐸᒃᐳᑦ ᓱᓇᓂᒃ ᐃᒃᓯᕙᐅᑕᖅ ᐃᖃᓇᐃᔭᖅᑎᓪᓗ ᐅᖃᐅᓯᖃᕈᖕᓇᕐᒪᖔᑖ.  ᑲᔪᓯᔪᒻᒥᒃ ᐊᕙᑎᓕᕆᓂᕐᒥᒃ ᖃᐅᔨᓴᕐᓂᕐᒧᑦ, ᐊᐱᖅᓱᕈᖕᓴᕐᓂᐊᖅᐳᑎᑦ ᑭᓯᐊᓐᓂ ᐃᖃᓇᐃᔭᖅᑎᑦ  ᐃᓱᒪᑕᖓᓐᓂᒃ ᑲᑎᒪᔨᓪᓘᕙ ᐃᓚᖓᓐᓂᒃ. ᑲᑎᒪᔨᑦ ᐃᒃᓯᕙᐅᑕᖓᑦ ᐊᒻᒪ ᑲᑎᒪᔨᐅᔪᑦ ᓂᑉᓕᖁᔭᐅᓯᒪᖏᑐᑦ ᐅᖃᐅᓯᖃᕐᓗᑎᒃ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐱᓕᕆᐊᕆᔭᖓᓐᓂᒃ. ᐃᓚᒃᑲᓂᕐᓗᒍ, ᐃᖃᓇᐃᔭᖅᑎ ᑎᒃᑯᐊᖅᑕᐅᓯᒪᔪᖅ ᐃᖃᓇᐃᔭᖅᑎᑦ ᐃᓱᒪᑕᖓᓐᓄᑦ ᐅᖃᖅᑎᐅᓂᐊᕐᓗᓂ ᐱᓕᕆᐊᖑᔪᒥᒃ ᐅᖃᕈᖕᓇᖅᑎᑕᐅᔪᖅ ᑕᐃᑉᓱᒧᖓ ᐱᓕᕆᐊᖑᔪᒧᑦ ᖃᐅᔨᓴᖅᑕᐅᔪᒧᑦ ᑭᓯᐊᓐᓂ. 

ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐃᓱᒪᓕᐊᖏᑦ, ᑐᓂᔭᐅᓯᒪᔪᑦ ᐊᓯᖏᓐᓄᑦ ᑎᒥᐅᔪᓄᑦ ᐊᓯᖏᓐᓂᒡᓗ ᓇᓗᓇᐃᖅᓯᒪᔪᓂᒃ ᐃᖕᒥᖕᓂᒃ ᐅᖃᐅᓯᕆᔭᕆᐊᖃᖅᐸᖓᑦ. ᐃᖃᓇᐃᔭᖅᑎ ᑐᑭᓕᐅᕆᖁᔭᐅᓯᒪᖏᑐᖅ ᐅᓂᑉᑳᕐᓗᓂᓗ ᓱᓇᒥᐊᒥᒃ ᑐᓴᒐᐅᔭᕆᐊᓕᖕᒥᒃ ᐃᓄᓗᒃᑖᓄᑦ ᑕᑯᔭᐅᔪᖕᓇᕐᓂᐊᖅᑐᒥᒃ. ᑐᑭᓯᒃᑲᓂᕈᐊᕐᓂᕈᕕᑦ ᑕᐃᑉᓱᒥᖓ ᐅᖃᐅᓯᐅᔪᒻᒥᒃ ᐃᓄᓗᒃᑖᓄᑦ ᑕᑯᔭᐅᔪᖕᓇᖅᑐᒥᒃ, ᑕᐃᑉᑯᐊ ᑎᒥᐅᔪᑦ ᐃᓄᒡᓘᓐᓃᑦ ᖃᐅᔨᒪᔨᖃᕐᓗᑎᓪᓘᓐᓃᑦ ᐊᓯᐊᓂᒃ ᑐᑭᓯᒃᑲᓂᕐᕕᒋᓂᓗᒋᐊᖃᖅᐸᑦ ᑎᑎᖃᖅ ᑐᓂᔭᐅᓯᒪᔪᖅ. 

ᖃᐅᔨᓴᕐᐸᒡᖢᑎᒃ ᐃᓄᓗᒃᑖᓄᑦ ᑕᑯᔭᐅᔪᖕᓇᖅᑐᓂᒃ ᖃᕆᑕᐅᔭᒻᒥ, ᑐᑭᓯᔪᑎᒃᓴᓗᒃᑖᓂᒃ ᐃᓗᓕᖃᖅᑐᓂᒃ ᐊᕙᑎᓕᕆᔨᒃᑯᑦ ᑎᑎᖃᖁᑎᖏᓐᓂᒃ, ᖃᐅᔨᒋᐊᕐᓗᒍ ᑐᒃᓯᕋᖅᓯᒪᔪᖅ ᐱᓕᕆᓱᐊᕐᓂᕐᒥᒃ ᖃᕆᑕᐅᔭᒃᑯᓪᓗ ᑕᑯᒋᐊᕐᓗᒋᑦ ᑎᑎᕋᖅᓯᒪᔭᖏᑦ ᓱᓇᒥᒃ ᐱᓕᕆᐊᖃᕐᓂᐊᕐᒪᖔᑖ. ᐊᕙᑎᓕᕆᔨᒃᑯᑦ ᐃᖃᓇᐃᔭᖅᑎᖏᑦ ᓇᐃᑦᑐᒥᒃ ᐅᓂᑉᑳᕕᒋᔪᖕᓇᖅᐹᑎᑦ ᐱᓕᕆᐊᖑᓂᐊᖅᑐᒥᒃ. ᑭᓯᐊᓐᓂ ᑐᒃᓯᕋᖅᓯᒪᔪᖅ ᐱᐅᓛᖑᔪᖅ ᑐᑭᓯᒃᑲᓂᕐᕕᒋᓂᐊᕐᓗᒍ ᐱᓕᕆᐊᖑᓂᐊᖅᑐᒥᒃ. ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᖃᓇᐃᔭᖅᑎᖏᓪᓗ ᐱᔾᔪᑎᓚᖏᐹᑎᑦ ᐊᐱᖅᓱᕐᓇᕐᒥ.  

ᖃᐅᔨᓴᕐᓂᕐᓄᑦ ᐊᕙᑎᓕᕆᔨᒃᑯᑦ ᑐᓴᖅᑎᑦᓯᒪᑎᓪᓗᒋᑦ ᐃᓄᓗᒃᑖᓐᓂᒃ ᑐᓵᓂᒃᑯᑦ ᐅᓂᑉᑳᖅᓯᒪᔪᑎᒍᑦ, ᐃᒃᓯᕙᐅᑕᖅ ᓂᑉᓕᕈᖕᓇᕐᓗᓐᓂ ᐊᑐᐃᓐᓇᐅᓂᐊᒻᐳᖅ. ᐃᒃᓯᕙᐅᑕᖅ ᑐᑭᓯᒃᑲᓂᖅᑎᑦᓯᔪᖕᓇᖅᑐᖅ ᐃᓱᒪᓕᐅᑕᐅᔪᒻᒥᒃ, ᑭᓯᐊᓐᓂ ᑎᑎᖃᖅ ᐃᓱᒪᓕᐅᕐᓂᑯᑦ ᐅᖃᖅᓯᒪᔭᖏᑦ ᑐᑭᓯᓐᓇᕋᔭᖅᑐᑦ ᐅᖃᓕᒫᒐᐅᓗᑎᒃ, ᑭᓯᐊᓐᓂ ᐃᒃᓯᕙᐅᑕᖅ ᐅᓂᑉᑳᕐᓂᕐᒥᒃ ᐊᔪᕐᓂᐊᖅᑐᖅ ᑐᑭᓕᐅᖅᑎᑦᓯᓗᓂᓗ ᑎᑎᖃᒻᒥᒃ.  ᐃᑲᔪᖅᑐᒐᐅᕗᑎᑦ ᐅᖃᖃᑎᖃᕐᓗᑎᑦ ᐃᓄᖕᒥᒃ ᑎᒥᐅᔪᓂᒡᓗ ᐱᓕᕆᐊᖃᖅᑐᓂᒃ ᖃᐅᔨᓴᕐᓂᒃᒥᒃ ᐃᓱᒪᓕᐅᕈᖕᓇᖅᑐᓂᒃ ᐱᓕᕆᐊᖑᓂᐊᖅᑐᖅ ᑲᔪᓯᔪᖕᓇᕐᓂᐊᕐᒪᖔᑦ. ᐱᐅᓂᖅᓴᐅᕗᖅ ᐅᔨᖅᑐᕐᓗᓐᓂ ᐅᖃᓕᒫᑎᐊᕐᓗᒍ ᑎᑎᕋᖅᓯᒪᔪᖅ ᓯᕗᓂᖓᓐᓂ ᐃᓱᒪᒋᔭᕐᓂᒃ ᐅᖃᐅᓯᖃᕐᓗᑎᑦ ᑎᑎᕋᕐᓗᑎᓪᓘᓐᓃᑦ.