ᐊᑐᐊᒐᕆᔭᐅᕗᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔪᒃᓯᑎᑦᑎᔪᒪᓪᓗᑎᒃ ᐊᔪᙱᑦᑐᓂᒃ ᐱᓇᔪᒍᓐᓇᖅᑐᓂᒃ ᐊᔪᕐᓇᙱᓐᓂᓕᒫᖓᓂ ᐊᑭᑐᓗᐊᙱᓐᓂᐅᔪᑦ ᐃᓐᓄᒃᑕᐅᖁᓪᓗᒋᑦ ᐃᖅᑲᓇᐃᔮᒃᓴᑦ ᐃᓐᓄᒃᑕᐅᓯᒪᙱᑦᑐᑦ ᐃᖅᑲᓇᐃᔮᒃᓴᓂᒃ ᐅᕝᕙᓘᓐᓃᑦ ᐃᖅᑲᓇᐃᔮᒃᓴᒃᑲᓐᓂᕐᓂᒃ ᐱᔭᕆᐊᖃᕌᖓᑕ ᖃᑯᒍᙳᕌᖓᑦ.  ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓯᕗᓪᓕᖅᐸᐅᔾᔨᓲᖑᕗᑦ ᐃᖅᑲᓇᐃᔭᖅᑎᑖᕈᒪᓪᓗᑎᒃ ᐊᔪᙱᑦᑐᓂᒃ ᓄᓇᕗᒻᒥ ᐃᓄᖕᓂᒃ (ᓄᓇᕗᒻᒥ ᐊᖏᖃᑎᒌᒍᑎ ᒪᓕᒡᓗᒍ) ᓯᕗᓪᓕᐅᑎᓗᒋᑦ, ᐊᒻᒪ ᓄᓇᕗᒻᒥᐅᑕᐅᖃᑕᐅᔪᑦ ᐊᐃᑉᐸᖓᓂ. ᐱᓇᔪᒃᑐᑦ ᐃᓱᒪᒋᔭᐅᔭᕆᐊᓖᑦ ᓄᓇᕗᒻᒥ ᐃᓅᓂᖏᓐᓂᒃ ᓄᓇᕗᒻᒥᐅᓂᒡᓘᓐᓃᑦ ᓇᓗᓇᐃᖅᓯᑦᑎᐊᕆᐊᖃᖅᑐᑦ ᓇᖕᒥᓂᖅ ᐊᑎᓕᐅᖅᑕᐅᖃᑕᐅᓯᒪᔪᑦ ᓈᓴᐅᑎᖓᓂᒃ ᐅᕝᕙᓘᓐᓃᑦ ᑐᕌᕈᑎᓪᓚᑦᑖᖓᓂᒃ ᐱᓇᔫᑎᖏᓐᓂᒃ, ᓂᕈᐊᖅᑕᐅᓇᓱᒃᑑᓪᓗ ᓈᒻᒪᒋᔭᐅᔪᒥᒃ ᖃᓄᐃᓕᖓᓂᖓ ᓇᓗᓇᐃᖅᑕᐅᑐᐃᓐᓇᕆᐊᓕᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.

ᐃᖅᑲᓇᐃᔮᖅᑖᕋᓱᒃᑐᓕᒫᑦ ᑎᑎᖅᑲᖁᑎᓕᒫᖏᑦ, ᐊᐱᖅᓱᖅᑕᐅᔾᔪᑎᖏᑦ, ᖃᐅᔨᓴᖅᑕᐅᔾᔪᑎᖏᑦ ᐊᒻᒪ ᐱᓇᔪᓪᓚᑦᑖᖅᓯᒪᔪᑦ ᑐᖅᑯᖅᑕᐅᓯᒪᓂᐊᖅᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐅᑭᐅᖕᓄᑦ ᒪᕐᕉᖕᓄᑦ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᖏᖅᓯᖃᑦᑕᕐᓂᐊᕐᒥᔪᑦ ᐱᓇᔫᑎᒋᔭᐅᓯᒪᙱᑦᑐᓂᒃ ᐃᖅᑲᓇᐃᔮᒧᑦ ᐱᔪᒥᓴᕈᑎᓂᒃ ᐅᕝᕙᓘᓐᓃᑦ ᐃᓕᓐᓂᐊᕈᑎᒃᓴᓂᒃ ᐃᓄᖕᓂᒃ ᐃᓱᒪᒋᔭᐅᔪᒪᔪᓂᒃ ᓯᕗᓂᒃᓴᒥ ᐃᖅᑲᓇᐃᔮᒃᓴᕆᔭᐅᔾᔮᙱᑦᑐᓄᑦ.



ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᒫᓐᓇ ᑐᙵᓱᒃᑎᑦᑎᕗᑦ ᐱᓇᔫᑎᓂᒃ ᐅᑯᓄᖓ ᐃᖅᑲᓇᐃᔮᒃᓴᓄᑦ:

ᑕᒪᕐᒥᑦᑎᐊᖅ ᐃᖅᑲᓇᐃᔭᖅᑏᑦ ᐃᓂᖏᑦ ᐃᖃᓗᒃᑑᑦᑎᐊᕐᒦᓐᓂᐊᖅᐳᑦ, ᓄᓇᕗᒻᒥ ᑭᓯᐊᓂ ᐊᓯᐊᒍᑦ ᐅᖃᐅᓯᐅᒃᐸᑦ.
*ᐃᖅᑲᓇᐃᔮᖅ ᒪᑐᐃᖓᔪᖅ ᓄᓇᕗᒻᒥ ᐃᓄᖕᓄᑐᐊᖅ.


ᐃᖅᑲᓇᐃᔮᑉ ᓇᓗᓇᐃᔭᖅᓯᒪᓂᖏᑦ
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (NIRB) ᑲᒪᒋᔭᖃᖃᑦᑕᖅᐳᑦ ᒫᓐᓇᓕᓴᕐᓂᒃ ᐃᖅᑲᓇᐃᔮᒃᓴᑦ ᓇᓗᓇᐃᖅᓯᒪᓂᖏᓐᓂᒃ ᑕᒪᐃᓐᓄᑦ ᐃᖅᑲᓇᐃᔮᒃᓴᓄᑦ. ᑕᒪᕐᒥᒃ ᐃᖅᑲᓇᐃᔮᑉ ᓇᓗᓇᐃᔭᖅᓯᒪᓂᖏᑦ ᓇᓗᓇᐃᔭᐃᔪᑦ ᐱᔾᔪᑎᖓᓂᑦ ᐃᖅᑲᓇᐃᔮᑉ, ᐊᑦᑐᐊᓂᖃᖅᑐᓂᑦ ᐱᓕᕆᐊᑦᓴᓂᑦ ᑲᒪᒋᔭᕆᐊᓕᓐᓂᓪᓗ, ᐱᔪᓐᓇᕐᓂᖃᕆᐊᓖᓪᓗ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓕᓴᖅᓯᐅᒪᖕᒪᑕ ᐃᖅᑲᓇᐃᔭᖅᑎᖏᑦ ᐊᑑᑎᖃᒻᒪᕆᖕᒪᑕ ᑎᑭᓐᓇᓱᐊᖅᑕᖏᓐᓄᑦ ᑲᑎᒪᔩᑦ ᐱᓇᓱᐊᖅᑕᖏᓐᓂᑦ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐃᖅᑲᓇᐃᔭᖅᑎᖏᑦ ᐱᕕᒃᓴᖃᖅᑎᑕᐅᑦᑎᐊᖃᑦᑕᖅᐳᑦ ᐃᖅᑲᓇᐃᔮᒥᓂᒃ ᓈᒻᒪᒃᓴᖅᑐᓂᒃ, ᓇᖕᒥᓂᖅ ᐱᕈᖅᐸᓪᓕᐊᔪᓂᒃ ᐊᒻᒪ ᐃᖅᑲᓇᐃᔮᒥ ᐱᕚᓪᓕᕈᑎᒃᓴᓂᒃ. ᐃᓕᓐᓂᐊᖅᑏᑦ ᐃᓱᒪᒋᔭᖃᖅᑐᑦ ᓯᕗᓂᒃᓴᒥ ᐃᖅᑲᓇᐃᔭᓛᕐᓂᕐᒧᑦ ᐊᒃᑐᖅᓯᓂᕐᒧᑦ ᖃᐅᔨᓴᖅᓯᓂᕐᒥᒃ ᑎᓕᐅᖅᑕᐅᕗᑦ ᖃᐅᔨᒋᐊᖁᔭᐅᓪᓗᑎᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔾᔪᑎᖃᕐᓗᑎᒃ ᐊᐅᔭᒃᑯᑦ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᐅᔾᔭᐅᑐᐃᓐᓇᕆᐊᓕᖕᓂᒃ, ᐃᖅᑲᓇᐃᔭᖅᑎᕈᖅᓴᓂᕐᓂᒃ ᐊᔪᕈᓐᓃᖅᓴᕐᓂᕐᒧᓪᓗ ᐱᕕᒃᓴᐅᕙᒃᑐᓂᒃ.

ᐊᐅᔭᒃᑯᑦ ᐃᓕᓐᓂᐊᖅᑏᑦ
ᐊᐅᔭᒃᑯᑦ ᐃᖅᑲᓇᐃᔭᕆᐅᖅᓴᕙᒃᑐᑦ ᑲᒪᒋᔭᒃᓴᖃᖅᐳᑦ ᐱᑎᑦᑎᕙᖕᓂᕐᒥᒃ ᑎᑎᕋᖅᑎᐅᓂᕐᒥᒃ ᐊᐅᓚᑦᑎᓂᕐᒧᓪᓗ ᐃᑲᔪᖅᑐᐃᓂᕐᒥᒃ ᐊᓯᖏᓐᓂᒡᓗ ᐱᓕᕆᐊᒃᓴᓂᒃ ᐱᔭᒃᓴᕆᑎᑕᐅᑎᑕᐅᔪᓂᒃ.

ᐊᓪᓚᕝᕕᓕᕆᔨ
ᐊᓪᓚᕝᕕᓕᕆᔨ ᑎᑎᕋᖅᑎᐅᓲᖑᕗᖅ, ᑎᑎᕋᕐᕕᓕᕆᕙᒡᓗᓂ ᐊᒻᒪ ᓯᕗᓕᖅᑎᓂᒃ ᐃᑲᔪᖅᐸᒃᖢᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᑖᓐᓇ ᐃᖅᑲᓇᐃᔮᖅ ᓯᕗᓪᓕᖅᐸᐅᓪᓗᓂ ᖃᐅᔨᒋᐊᕐᕕᐅᖃᑦᑕᖅᐳᖅ ᑎᑎᕋᕐᕕᖕᒦᓪᓗᓂ, ᑐᙵᓱᒃᑎᑦᑎᕙᒃᖢᓂ ᐊᒻᒪ ᐱᓕᕆᔨᓪᓚᕆᖕᓂᒃ ᐊᑐᐃᓐᓇᐅᑎᑦᑎᕙᒡᓗᓂ ᐊᒻᒪ ᐃᑲᔪᖅᑐᐃᕙᒡᓗᓂ ᑲᑎᒪᔨᓂᒃ, ᐃᖅᑲᓇᐃᔭᖅᑎᓂᒃ ᐊᒻᒪ ᑭᒃᑯᑐᐃᓐᓇᓂᒃ ᖃᐅᑕᒫᑦ.

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᕗᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᔾᔪᓯᖏᓐᓂᒃ, ᖃᓄᐃᓕᐅᖅᑎᑦᑎᓂᖏᓐᓂᒃ, ᐊᒻᒪ ᐃᓱᒪᓕᐊᕆᔭᖏᓐᓂᒃ ᒐᕙᒪᒃᑯᓐᓄᑦ, ᐃᓄᐃᑦ ᑲᑐᔾᔨᖃᑎᒌᓄᑦ, ᓄᓇᓕᖕᓂ ᑲᑐᔾᔨᖃᑎᒌᓄᑦ, ᐱᕙᓪᓕᐊᔪᓕᕆᔨᓄᑦ ᐊᒻᒪ ᐃᓄᖕᓄᑦ. ᑖᓐᓇ ᐃᖅᑲᓇᐃᔮᖅ ᐊᑐᐃᓐᓇᐅᑎᑦᓯᓂᐊᖅᑐᖅ ᕿᒥᕐᕈᓂᕐᒥᑦ ᐃᓱᒪᑦᓴᖅᓯᐅᕐᓂᕐᒥᓪᓗ ᐃᑲᔪᖅᑐᕐᓂᕐᒥᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᓄᓐᓂᑦ ᐃᓚᐅᑎᑦᓯᓂᕐᒧᑦ ᐱᒐᓱᐊᕐᓂᖏᓐᓂᑦ, ᓇᓗᓇᐃᖅᓯᓂᕐᒥᑦ ᑐᓴᐅᒪᖃᑦᑕᐅᑎᓂᕐᒥᑦ ᐱᓕᕆᔨᒻᒪᕆᐅᓂᖏᓐᓂᑦ ᐊᑐᐃᓐᓇᐅᓂᖏᓐᓂᓪᓗ, ᑐᓂᓯᓂᕐᒥᑦ ᑐᓴᖅᑕᐅᒋᐊᖃᖅᑐᓂᑦ ᑐᕌᖅᑐᓄᑦ ᐃᓄᓐᓄᑦ.

ᑐᑭᒧᐊᒃᑎᑦᑎᔨ, ᐃᖅᑲᓇᐃᔭᕐᕕᐅᑉ ᐱᔨᑦᑎᕋᖅᑎᖏᓐᓄᑦ
ᑲᒪᒋᔭᖃᖅᐸᒡᓗᓂ ᐊᔾᔨᒌᙱᑦᑐᓂ−ᐃᓂᖅᑎᕆᓂᕐᒧᑦ ᐱᓕᕆᖃᑎᒌᓂᒃ, ᑐᑭᒧᐊᖅᑎᑦᑎᔨ, ᐱᓕᕆᕝᕕᖕᒥ ᐊᐅᓚᑦᑎᓂᕐᒧᑦ ᐱᔨᑦᑎᕋᖅᑏᑦ ᑲᒪᒋᔭᖃᖅᑕᖅᐳᖅ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᓪᓗ ᐃᑲᔪᖅᑐᐃᓂᕐᒧᑦ ᐱᔨᑦᑎᕋᐅᑎᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᓇᓗᓇᐃᖅᓯᕙᒡᓗᓂ ᒪᓕᑦᑎᐊᕐᓂᖏᓐᓂᒃ ᐊᒃᑐᐊᓂᓕᖕᓂᒃ ᒪᓕᒐᕐᓂᒃ, ᒪᓕᒋᐊᓕᖕᓂᒃ, ᑮᓇᐅᔭᓕᕆᓂᕐᒧᑦ/ᓇᖕᒥᓂᕆᔭᐅᔪᓄᑦ ᐱᓕᕆᔾᔪᓯᖏᓐᓂᒃ, ᐊᑐᐊᒐᕐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ ᐊᒻᒪ ᑮᓇᐅᔭᖃᖅᑎᑦᑎᔩᑦ ᐅᓂᒃᑳᓕᐅᕆᐊᖃᕐᓂᖏᓐᓂᒃ.  ᑖᓐᓇ ᐃᖅᑲᓇᐃᔮᖅ ᐊᖓᔪᖅᑳᖃᕐᓂᐊᖅᑐᖅ ᑐᑭᒧᐊᑦᑎᑦᓯᔨᒻᒪᕆᒻᒥᑦ ᐅᖃᐅᔾᔪᐃᖃᑦᑕᕐᓗᓂᓗ ᑲᑎᒪᔨᓂᑦ ᑐᕋᐃᓐᓇᕐᓗᓂ ᑮᓇᐅᔭᓕᕆᓂᕐᒧᑦ ᐊᓪᓚᕝᕕᓕᕆᓂᕐᒧᓪᓗ ᐃᓱᒫᓘᑕᐅᔪᓂᑦ, ᓇᓗᓇᐃᖅᓯᓂᕐᒥᑦ ᓄᓇᕗᒻᒥ ᐊᑦᑐᖅᑕᐅᓂᕐᒧᑦ ᑲᑎᒪᔩᑦ ᑲᒪᒋᔭᖃᑦᓯᐊᕋᓗᐊᕐᒪᖔᑕ ᑕᒻᒪᖅᓯᒪᖏᑦᑐᓂᑦ, ᓴᖅᑭᔮᑦᓯᐊᖅᑐᓂᑦ ᑲᒪᒋᔭᖃᕐᓂᕐᒥᓪᓗ ᑮᓇᐅᔭᓕᕆᓂᕐᒧᑦ ᐱᓕᕆᔾᔪᓯᕐᓂᑦ.

ᑐᑭᒧᐊᒃᑎᑦᑎᔨ, ᐊᑐᓕᖅᑎᑦᑎᕙᓪᓕᐊᓂᕐᒧᑦ
ᑲᒪᒋᔭᖃᕐᓂᐊᖅᑐᖅ ᐊᐅᓚᑦᑎᓂᕐᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᖃᓄᖅᑑᕈᑎᒃᓴᓄᑦ ᐱᕙᒌᔭᐅᑎᖏᓐᓂᒃ ᐊᒻᒪ ᐊᑐᓕᖅᑎᑦᑎᑦᑎᐊᕋᓗᐊᕐᒪᖔᑦ ᑲᑐᔾᔨᖃᑎᒌᓕᒫᓂᒃ. ᑖᓐᓇ ᐃᖅᑲᓇᐃᔮᖅ ᐊᖏᖅᓯᒪᓂᖃᖅᑐᖅ ᐊᐅᓚᑦᓯᓂᕐᒧᑦ ᐱᒐᓱᐊᕐᓂᕐᒥᑦ, ᐅᖃᐅᔾᔪᐃᓂᕐᒥᑦ ᐱᓕᕆᐊᓂᑦ ᐱᓕᕆᖃᑎᒌᓂᑦ, ᐱᓕᕆᖃᑎᖃᕐᓂᕐᒥᓪᓗ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᓴᖅᑭᑎᑦᓯᓂᕐᒥᑦ ᑲᑐᔾᔨᓂᕐᒥᑦ ᖃᓄᐃᓕᐅᕈᑕᐅᔪᒪᔪᓂᑦ ᐱᓕᕆᔾᔪᓯᕐᓂᓪᓗ ᐱᔨᑦᓯᕋᕐᓂᕐᒥᑦ ᐃᓄᓐᓂᑦ ᐊᑑᑎᖃᑦᓯᐊᖅᑐᒥᑦ. ᑐᑭᒧᐊᒃᑎᑦᑎᔨ, ᐊᑐᓕᖅᑎᑦᑎᔨ ᑲᒪᒋᔭᖃᕐᓂᐊᖅᑐᖅ ᖃᐅᔨᓴᕐᓂᕐᒥᒃ ᐊᑐᓕᖁᔨᓂᕐᒥᒡᓗ ᐊᓯᔾᔨᖅᑐᓂᒃ ᐊᑐᐊᒐᓄᑦ, ᐊᑐᖅᑕᐅᔭᕆᐊᓕᖏᓐᓄᑦ, ᐊᒻᒪ ᒪᓕᒃᑕᐅᒋᐊᖃᖅᑐᓄᑦ ᒪᓕᑦᑎᐊᖁᓪᓗᒋᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐱᓕᕆᐊᒃᓴᖏᓐᓂᒃ ᐊᒻᒪ ᖃᓄᖅᑑᕈᑎᓄᑦ ᑐᕌᒐᕆᔭᐅᔪᓂᒃ. ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑐᙵᕕᖃᖅᑎᑦᑎᕙᒡᓗᓂ, ᑖᔅᓱᒥᖓ ᐃᖅᑲᓇᐃᔮᓕᒃ ᓇᓗᓇᐃᖅᓯᓯᒪᓗᓂ ᓯᕗᓕᖅᑎᐅᓂᕐᒥᒃ ᓴᖅᑭᑎᑦᑎᕙᒡᓗᓂ ᑐᑭᓯᓇᑦᑎᐊᖅᑐᓂᒃ ᑐᕌᒐᖏᓐᓂᒃ ᐱᓕᕆᐊᒃᓴᓄᑦ ᐊᒻᒪ ᐱᓕᕆᐊᒃᓴᓄᑦ, ᐊᒻᒪᓗᑦᑕᐅᖅ ᑲᒪᒋᔭᖃᖅᐸᒡᓗᓂ ᐊᑐᓕᖅᑎᑕᐅᑦᑎᐊᖅᑐᓂᒃ ᐊᑯᓂᐅᔪᒃᑯᑦ ᐸᕐᓇᐃᓂᒃᑯᑦ, ᐱᕙᓪᓕᐊᑎᑦᑎᓂᒃᑯᑦ, ᐊᒻᒪ ᑲᔪᓯᑎᑦᑎᓂᒃᑯᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᓕᕆᐊᒃᓴᓂᒃ ᐱᓕᕆᐊᖑᕙᓪᓕᐊᔪᒪᔪᓂᒡᓗ.  

ᑐᑭᒧᐊᒃᑎᑦᑎᔨ, ᐱᓕᕆᐊᖑᔪᓄᑦ
ᑲᒪᒋᔭᖃᖅᐸᒡᓗᓂ ᐅᓄᖅᑐᓂᒃ−ᐃᓂᖅᑎᕆᓂᕐᒧᑦ ᐱᓕᕆᖃᑎᒌᓂᒃ, ᑐᑭᒧᐊᒃᑎᑦᑎᔨ, ᐊᐅᓚᔾᔪᑎᓄᑦ ᓯᕗᓕᖅᑎᒋᔭᐅᕗᖅ ᐱᕙᓪᓕᐊᑎᑕᐅᔪᓄᑦ ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑕᐅᔪᓂᒃ ᐊᒻᒪ ᐱᓕᕆᐊᒥᒃ ᖃᐅᔨᓴᖅᐸᓪᓕᐊᓂᕐᒥᒃ

ᑐᑭᒧᐊᖅᑎᑦᑎᔨᒻᒪᕆᒃ
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᒃᓯᕙᐅᑕᖓᑦ ᖃᓄᐃᓕᐅᖁᔭᐅᕙᒡᓗᓂ, ᑐᑭᒧᐊᒃᑎᑦᑎᔨᒻᒪᕆᒃ ᑲᒪᒋᔭᒃᓴᖃᖅᐳᖅ ᐊᔪᕆᖅᓲᔾᔨᕙᒡᓗᓂ, ᓯᕗᓕᖅᑎᐅᕙᒡᓗᓂ ᐊᒻᒪ ᐊᐅᓚᑦᑎᕙᒡᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐊᐅᓚᑕᖏᓐᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂᒃ, ᐅᖃᐅᔾᔪᐃᕙᒡᓗᓂ, ᖃᓄᐃᓕᐅᖁᔨᕙᒡᓗᓂ ᐊᒻᒪ ᐊᑐᓕᖁᔨᕙᒡᓗᓂ ᑲᑎᒪᔨᓄᑦ ᑲᑎᒪᔨᓄᑦ ᐱᓕᕆᐊᒃᓴᕆᑎᑕᐅᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔾᔪᑎᒋᓪᓗᒋᑦ.

ᓄᓇᙳᐊᓕᐅᖅᑎᓪᓚᕆᒃ
ᓄᓇᙳᐊᓕᕆᔨᒻᒪᕆᒃ ᐋᖅᑭᒃᓱᐃᕙᒃᐳᖅ ᑲᒪᒋᔭᖃᖅᐸᒃᐳᕐᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐃᓗᐊᓂ ᓄᓇᙳᐊᓕᕆᓂᕐᒧᑦ ᑐᑭᓯᒋᐊᕈᑎᓂᒃ ᐊᒻᒪ ᓄᓇᙳᐊᓕᕆᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᐊᒃᑐᐊᓂᓕᖕᓂᒃ ᐊᕙᑎᑦᑎᓐᓂ ᐊᒃᑐᐃᔪᓂᒃ ᖃᐅᔨᓴᖅᑕᐅᔪᓂᒃ.  ᑖᓐᓇ ᐃᖅᑲᓇᐃᔮᖅ ᐊᑐᐃᓐᓇᐅᑎᑦᓯᓂᐊᖅᑐᖅ ᐱᓕᕆᔾᔪᑎᓄᑦ ᐃᑲᔪᖅᑐᕐᓂᕐᒥᑦ ᑲᑎᒪᔨᓄᑦ ᐃᖅᑲᓇᐃᔭᖅᑎᓄᓪᓗ, ᐃᓗᓕᖏᓐᓂᑦ ᑐᓴᖅᑕᐅᑎᑦᓯᔾᔪᑎᓂᑦ ᖃᐅᔨᓴᕐᓂᕐᒧᑦ ᐱᔪᓐᓇᑎᑦᓯᓂᕐᒥᓪᓗ ᐱᐅᓯᕚᓪᓕᑎᑦᓯᓂᕐᒥᑦ ᑐᑭᓯᐅᒪᓂᕐᒥᑦ ᐊᕙᑎᒧᑦ ᐊᑦᑐᖅᑕᐅᓂᐅᑐᐃᓐᓇᕆᐊᓕᓐᓂᑦ ᐅᓄᖅᓯᑎᑦᓯᓂᕐᒧᑦ ᖃᓄᐃᓐᓂᐅᔪᓂᑦ ᐅᔾᔨᕈᓱᑦᑎᑦᓯᓂᕐᒥᑦ ᑲᑎᑉᐸᓪᓕᐊᔪᓂᓪᓗ ᐊᑦᑐᖅᑕᐅᓂᕐᒧᑦ ᖃᐅᔨᓴᕐᓂᕐᒥᑦ.

ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑎ
ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑎ ᓯᕗᒃᑲᖅᑕᐃᕗᖅ ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑕᐅᔪᓂᒃ ᑐᒃᓯᕋᐅᑕᐅᓯᒪᔪᓂᒃ ᐱᕙᓪᓕᐊᑎᑕᐅᔪᓂᒃ ᐱᓕᕆᐊᓂᒃ ᐅᖃᐅᓯᐅᓯᒪᔪᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑎᑎᕋᖅᓯᒪᓂᓕᒃ 12 ᒪᓕᒃᖢᒍ ᓄᓇᕗᒻᒥ ᐊᖏᖃᑎᒌᒍᑎᒥ ᐊᒻᒪ ᐃᓚᖓᑦ 3 ᓄᓇᕗᒻᒥ ᐸᕐᓇᐃᔨᑦ ᐊᒻᒪ ᐱᓕᕆᐊᓂᒃ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA). ᑲᒪᒋᔭᖃᓪᓗᐊᑕᕐᓗᓂ ᐊᐅᓚᑦᑎᓂᕐᒥᒃ ᐅᓄᖅᑐᓂᒃ ᖃᐅᔨᓴᖅᑕᐅᓂᕐᓂ ᐃᑲᔪᖅᐸᒃᓗᓂᓗ ᖃᐅᔨᓴᕐᓂᕐᓂ ᐊᖏᔪᓄᑦ ᐱᕙᓪᓕᐊᔾᔪᑎᓄᑦ ᐱᓕᕆᐊᒃᓴᓄᑦ, ᑖᓐᓇ ᐃᖅᑲᓇᐃᔮᒃᓴᖅ ᐅᖃᐅᔾᔨᕙᒃᓗᓂ ᖁᑦᑎᖕᓂᖅᓴᒥ ᐊᐅᓚᑦᑎᔨᓂᑦ ᐱᓪᓗᒍ ᐊᐅᓚᓂᕐᓄᑦ ᐱᔾᔪᑎᑦ, ᖃᐅᔨᒪᒋᐊᕐᓗᓂ ᖃᐅᔨᓴᕈᑎᑦ ᐱᓕᕆᐊᖑᓗᑎᒃ ᓈᒻᒪᒃᑐᒃᑯᑦ, ᐃᓚᐅᑎᑦᑎᓂᒃᑯᑦ, ᓈᒻᒪᒃᑐᒃᑯᓪᓗ.

ᑐᓵᔨ/ᑐᑭᓕᐅᕆᔨ
ᑐᓵᔨ/ᑐᑭᓕᐅᕆᔨ ᑲᒪᒋᔭᖃᕐᓂᐊᖅᑐᖅ ᐊᑐᐃᓐᓇᐅᑎᑦᓯᓂᕐᒥᑦ ᐱᓕᕆᔨᒻᒪᕆᐅᓂᕐᒥᑦ ᐃᓄᒃᑎᑐᑦ-ᖃᓪᓗᓈᑎᑐᑦ ᐊᒻᒪᓗ/ᐅᕝᕙᓘᓐᓃᑦ ᐃᓄᐃᓐᓇᖅᑐᓐ-ᖃᓪᓗᓈᑎᑐᑦ ᑐᓵᔨᐅᓂᕐᒥᑦ ᑐᑭᓕᐅᕆᓂᕐᒥᓪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.  ᑖᓐᓇ ᐃᖅᑲᓇᐃᔮᒃᓴᖅ ᓂᕆᐅᒋᔭᐅᕗᖅ ᓴᖅᑭᔮᖅᑎᑦᑎᒃᑲᓐᓂᕋᓱᒡᓗᓂ ᑎᒍᐊᕐᓂᕐᒥᒃ ᐊᒻᒪ ᐊᑐᖅᑕᐅᓂᖓᓂᒃ ᐃᓄᒃᑎᑐᑦ/ᐃᓄᐃᓐᓇᖅᑐᑦ ᐅᖃᐅᓯᕐᒥᒃ ᐊᒃᑐᐃᔪᓂᒃ ᖃᐅᔨᓴᖅᐸᓪᓕᐊᑎᓪᓗᒋᑦ ᐊᒻᒪ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐊᐅᓚᓂᕆᔭᖏᓐᓂᒃ.

ᐊᐅᓚᑦᑎᔨ, ᐊᒃᑐᖅᑕᐅᓂᕐᒧᑦ ᖃᐅᔨᓴᕐᓂᕐᒧᑦ
ᐊᐅᓚᑦᑎᔨ ᐊᒃᑐᖅᑕᐅᓂᕐᒧᑦ ᖃᐅᔨᓴᕐᓂᕐᓂ ᑐᑭᒧᐊᒃᑎᑦᑎᓲᖅ ᐊᒃᑑᑎᔪᓄᑦ ᖃᐅᔨᓴᕐᓂᕐᓂ ᑐᒃᓯᕋᖅᑕᓄᑦ ᐱᕙᓪᓕᐊᓂᕐᒧᑦ ᐱᓕᕆᐊᒃᓴᓄᑦ ᐅᖃᐅᓯᐅᔪᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑕᐃᑰᓇ ᑎᑎᕋᖅᓯᒪᔪᖅ 12 ᓄᓇᕗᒻᒥ ᐊᖏᕈᑎᒥᒃ ᐊᒻᒪ ᐃᓚᖓ 3 ᓄᓇᕗᒻᒥ ᐸᕐᓇᐃᓂᖅ ᐱᓕᕆᐊᒃᓴᒧᓪᓗ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA) ᐊᒻᒪᓗᑦᑕᐅᖅ ᐃᓱᒪᒋᒃᑲᓐᓂᕐᓗᒋᑦ ᐊᖏᖅᑕᐅᓯᒪᔪᑦ ᐱᓕᕆᐊᒃᓴᒧᑦ ᓇᓗᓇᐃᒃᑯᑕᑦ ᐊᑐᕆᐊᓖᑦ ᒪᓕᒋᐊᓖᓪᓗ. ᑖᓐᓇ ᐃᖅᑲᓇᐃᔮᖅ ᑲᒪᒋᔭᖃᕐᓂᐊᖅᑐᖅ ᑲᒪᒋᔭᖃᕐᓂᕐᒥᑦ ᐃᖅᑲᓇᐃᔭᖅᑎᓂᑦ ᐊᑐᐃᓐᓇᐅᑎᑦᓯᓂᕐᒥᓪᓗ ᐃᑲᔪᖅᑐᕐᓂᕐᒥᑦ ᑐᑭᒧᐊᑦᑎᑦᓯᔨᒥᑦ, ᐊᐅᓚᓂᐅᔪᓂᑦ ᐊᐅᓚᑦᓯᓂᕐᒥᑦ ᐱᕙᓪᓕᐊᑎᑦᓯᓂᕐᒥᑦ ᐊᔾᔨᒌᓕᖅᑎᑦᓯᓂᕐᒥᓪᓗ ᐊᑦᑐᖅᑕᐅᓂᕐᒧᑦ ᖃᐅᔨᓴᕐᓂᕐᒥᑦ ᐊᑐᖅᑕᐅᖃᑦᑕᖅᑐᓂᑦ, ᐱᓕᕆᔾᔪᓯᕐᓂᑦ, ᑐᑭᒧᐊᑦᑎᑦᓯᓂᕐᒥᓪᓗ ᐱᖁᑎᓂᑦ.

ᐊᐅᓚᑦᑎᔨ, ᐊᑐᐊᒐᓕᕆᓂᕐᒧᑦ
ᐊᐅᓚᑦᑎᔨ ᐊᑐᐊᒐᓄᑦ ᐱᑎᑦᑎᓲᖅ ᑐᕌᒐᒃᓴᖏᓐᓂ ᖃᐅᔨᓴᕐᓂᕐᓂ ᐅᖃᐅᔾᔨᒋᐊᕈᑎᓂᒃᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᓪᓗᒍ ᐊᔾᔨᒌᖏᑦᑐᑦ ᐃᓗᐊᓂ ᓯᓚᑖᓂᓗ ᐊᑐᐊᒐᑦ, ᐸᕐᓇᐃᓂᖅ ᒪᓕᒐᓕᐊᓄᓪᓗ ᐊᑐᓕᖅᑎᑕᐅᔪᓂᑦ.  ᑐᓴᖅᑎᑦᑎᕙᒡᓗᓂ ᐊᑐᓕᖅᑎᑦᑎᔨᑦ ᑐᑭᒧᐊᒃᑎᑦᑎᔨᖓᓄᑦ, ᑖᔅᓱᒥᖓ ᐃᖅᑲᓇᐃᔮᓕᒃ ᖃᓄᖅᑑᕈᑎᒃᓴᓄᑦ ᐸᕐᓇᐃᓪᓗᐊᑕᖃᑦᑕᕐᓂᐊᖅᐳᖅ ᐊᒻᒪ ᐃᑲᔪᖅᐸᒡᓗᓂ ᓇᓗᓇᐃᖅᓯᖃᑕᐅᕙᒡᓗᓂ ᐊᑲᐅᙱᓪᓕᐅᕈᑕᐅᔪᓂᒃ ᐱᓕᕆᐊᒃᓴᓂᒃ, ᐊᓯᖔᖏᓐᓂᒃ ᐱᓕᕆᐊᖑᖔᕈᓐᓇᖅᑐᓂᒃ ᐊᒻᒪ ᐊᑐᐊᒐᕐᓂᒃ ᐱᑕᖃᙱᓐᓂᐅᔪᓂᒃ, ᖃᐅᔨᓴᖅᐸᒡᓗᓂᓗ ᑮᓇᐅᔭᓕᕆᔾᔪᑎᓂᒃ/ᒪᓕᒐᖅᑎᒍᑦ ᐊᒃᑐᐃᔾᔪᑕᐅᓲᓂᒃ, ᐱᓕᕆᕝᕕᖕᒥᐅᑕᐅᖃᑎᒌᙱᑦᑐᑦ ᐊᒻᒪ ᓯᓚᑖᓂᙶᖅᑐᑦ ᐊᒃᑐᐃᔾᔪᑕᐅᓲᑦ ᐊᒻᒪ ᒪᓕᑦᑎᐊᖅᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᐊᒃᓴᖏᓐᓂᒃ. ᐊᐅᓚᑦᑎᔨ, ᐊᑐᐊᒐᓕᕆᓂᕐᒧᑦ ᐊᖓᔪᖅᑳᓪᓗᐊᑕᐅᔪᖅ ᐊᑐᐊᒐᓕᕆᔨᒧᑦ.

ᐊᐅᓚᑦᑎᔨ, ᐱᓕᕆᐊᒃᓴᓂᒃ ᓇᐅᑦᑎᖅᓱᖅᑎ
ᐊᐅᓚᑦᑎᔨ ᐱᓕᕆᐊᒃᓴᓄᑦ ᖃᐅᔨᓴᖅᐸᓪᓕᐊᔭᒥᒃ ᓯᕗᓕᖅᑎᐅᓂᐊᖅᐳᖅ ᐱᓕᕆᐊᒃᓴᓂᒃ ᐊᖏᖅᑕᐅᓯᒪᔪᓄᑦ ᐱᓕᕆᐊᒃᓴᓄᑦ ᐅᖃᐅᓯᐅᓯᒪᔪᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑎᑎᕋᖅᓯᒪᓂᓕᒃ 12 ᒪᓕᒃᖢᒍ ᓄᓇᕗᒻᒥ ᐊᖏᖃᑎᒌᒍᑎᒥ ᐊᒻᒪ ᐃᓚᖓ 3 ᓄᓇᕗᒻᒥ ᐸᕐᓇᐃᔨᑦ ᐊᒻᒪ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA). ᑖᓐᓇ ᐃᖅᑲᓇᐃᔮᖅ ᑲᒪᒋᔭᖃᕐᓂᐊᖅᑐᖅ ᑲᒪᒋᔭᖃᕐᓂᕐᒥᑦ ᐃᖅᑲᓇᐃᔭᖅᑎᓂᑦ ᐊᑐᐃᓐᓇᐅᑎᑦᓯᓂᕐᒥᓪᓗ ᐃᑲᔪᖅᑐᕐᓂᕐᒥᑦ ᑐᑭᒧᐊᑦᑎᑦᓯᔨᒥᑦ, ᐊᐅᓚᓂᐅᔪᓂᑦ ᐊᐅᓚᑦᓯᓂᕐᒥᑦ ᐱᕙᓪᓕᐊᑎᑦᓯᓂᕐᒥᑦ ᐊᔾᔨᒌᓕᖅᑎᑦᓯᓂᕐᒥᓪᓗ ᐊᑐᖅᑕᐅᖃᑦᑕᖅᑐᓂᑦ, ᐱᓕᕆᔾᔪᓯᕐᓂᑦ, ᑐᑭᒧᐊᑦᑎᑦᓯᓂᕐᒥᓪᓗ ᐱᖁᑎᓂᑦ ᐊᑦᑐᐊᓂᓕᓐᓂᑦ

ᐊᐅᓚᑦᑎᔨ, ᑭᒃᑯᑐᐃᓐᓇᕐᓄᑦ ᐊᑎᓕᐅᕐᕕᒃ
ᐊᐅᓚᑦᑎᔨ, ᑭᒃᑯᑐᐃᓐᓇᕐᓄᑦ ᐊᑎᓕᐅᕐᕕᒃ ᑲᒪᒋᔭᖃᕐᓂᐊᖅᑐᖅ ᑕᑯᓇᒃᐸᒃᓗᓂ ᖃᐅᑕᒫᑦ ᓴᓇᔪᓕᕆᓂᕐᓂ ᖃᕋᓴᐅᔭᒃᑯᑦ ᑎᑎᖅᑲᓕᐊᕆᓯᒪᙱᑦᑐᓄᓪᓗ ᑭᒃᑯᑐᐃᓐᓇᕐᓄᑦ ᐊᑎᓕᐅᖅᑕᐅᓯᒪᔪᓄᑦ ᐊᒃᑐᐊᓂᓕᖕᓄᑦ ᖃᐅᔨᓴᖅᑕᐅᓂᕐᓂ ᐊᑐᓕᖅᑎᑕᐅᔪᓂᒃ ᑕᐃᑰᓇ ᑎᑎᕋᖅᓯᒪᔪᖅ 12 ᓄᓇᕗᒻᒥ ᐊᖏᕈᑎᒥᒃ ᐊᒻᒪ ᐃᓚᖓ 3 ᓄᓇᕗᒻᒥ ᐸᕐᓇᐃᓂᕐᒧᑦ ᐱᓕᕆᐊᒃᓴᒧᓪᓗ ᖃᐅᔨᓴᕐᓂᕐᒧᑦ ᐱᖁᔭᕐᒥ. ᑖᔅᓱᒥᖓ ᐃᖅᑲᓇᐃᔮᓕᒃ ᑲᒪᒋᔭᖃᖃᑦᑕᖅᐳᖅ ᑎᑭᑉᐸᓪᓕᐊᔪᓂᒃ ᐊᒻᒪ ᐊᓂᕙᓪᓕᐊᔪᓂᒃ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᑐᑭᒧᐊᒃᑎᑦᑎᕙᒡᓗᓂ ᐊᐱᖅᑯᑕᐅᔪᓂᒃ ᐊᒻᒪ ᐊᐅᓚᑦᑎᕙᒡᓗᓂ ᑐᑭᓯᒋᐊᒐᒃᓴᓂᒃ ᐱᔾᔪᑎᓕᖕᓂᒃ ᖃᐅᔨᓴᖅᑕᐅᔪᓂᒃ ᐊᒻᒪ ᕿᒥᕐᕈᔭᐅᔪᓂᒃ ᖃᐅᔨᓴᖅᑕᐅᔪᓂᒃ ᐊᒻᒪ ᖃᐅᔨᓴᖅᐸᓪᓕᐊᓂᕐᒧᑦ ᐱᓕᕆᐊᓂᒃ. ᐊᐅᓚᑦᑎᔨ ᑭᒃᑯᑐᐃᓐᓇᕐᓄᑦ ᐊᑎᓕᐅᕆᔨᓄᑦ ᑲᒪᒋᔭᖃᕐᒥᔪᖅ ᑲᒪᒋᔭᖃᕐᓂᕐᒥᑦ ᑭᒃᑯᑐᐃᓐᓇᕐᓄᑦ ᐊᑎᓕᐅᕆᔩᑦ ᑐᑭᒧᐊᑦᑎᑦᓯᔨᖏᓐᓂᑦ, ᐃᑲᔪᕐᓂᕐᒥᑦ ᐱᓕᕆᐊᑦᓴᓂᑦ ᐊᐅᓚᑦᓯᓂᕐᒥᑦ/ᓇᓂᓯᓂᕐᒥᑦ ᖃᐅᔨᓴᕐᓂᕐᒧᑦ-ᓇᓗᓇᐃᖅᑕᐅᓯᒪᔪᓂᑦ ᐃᓱᓕᕝᕕᑦᓴᓕᓐᓂᑦ, ᑐᓴᐅᒪᖃᑦᑕᐅᑎᓂᕐᒥᑦ ᐱᖁᑎᓂᓪᓗ.

ᓇᐅᑦᓯᖅᑐᐃᔨ
ᐅᖃᕐᕕᖃᖅᐸᒡᓗᓂ ᐊᐅᓚᑦᑎᔨᒧᑦ, ᐱᓕᕆᐊᒃᓴᒥᒃ ᓇᐅᑦᑎᖅᓱᖅᓯᓂᕐᒧᑦ ᐱᓕᕆᔨ ᐊᐅᓚᑦᑎᕙᒃᐳᖅ ᓇᐅᑦᑎᖅᓱᖅᓯᓂᕐᒧᑦ ᐱᓕᕆᐊᖑᔪᓂᒃ ᐱᓕᕆᐊᒃᓴᓄᑦ ᐊᖏᖅᑕᐅᔪᓄᑦ ᑲᔪᓯᑎᑕᐅᔪᒪᓪᓗᓂ ᑎᑎᕋᖅᓯᒪᓂᖓᒍᑦ 12-ᒧᑦ ᓄᓇᕗᒻᒥ ᐊᖏᖃᑎᒌᒍᑎᒥ ᐊᒻᒪᓗ ᑎᑎᕋᖅᓯᒪᓂᖓᓂ 3-ᒥ ᓄᓇᕗᒻᒥ ᐱᕙᒌᔭᕐᓂᕐᒧᑦ ᐱᓕᕆᐊᖑᔪᒥᓗ ᖃᐅᔨᓴᖅᓯᓂᕐᒧᑦ ᐱᖁᔭᕐᒥ (NuPPAA−ᑯᑦ). ᑕᐅᑐᒃᑕᑐᐊᖃᑲᐃᓐᓇᕐᓗᓂ ᖃᐅᔨᓴᐃᓐᓇᕐᓂᕐᒥᒃ ᒪᓕᑦᑎᐊᕐᓂᕐᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᐱᓕᕆᐊᒃᓴᒧᑦ ᓇᓗᓇᐃᒃᑯᑕᕐᒥ ᐊᑐᕆᐊᓕᖏᓐᓂᒃ ᒪᓕᒋᐊᓕᖏᓐᓂᒡᓗ, ᐊᓯᖏᓐᓂᒃ ᐊᑐᐊᒐᑎᒍᑦ ᐊᑐᒐᒃᓴᓂᑦ, ᐊᑐᕆᐊᓖᑦ ᒪᓕᒋᐊᓖᓪᓗ ᐋᖅᑭᒃᑕᐅᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᕿᒥᕐᕈᓂᕐᒧᑦ ᐋᖅᑭᒃᑕᓂᑦ, ᑖᓐᓇ ᐃᖅᑲᓇᐃᔮᒃᓴᖅ ᐃᑲᔪᕐᒥᓗᓂ ᐊᐅᓚᓂᕐᓄᑦ ᐃᖅᑲᓇᐃᔭᖅᑎᓄᑦ ᐊᒃᑑᑎᔪᓄᑦ ᖃᐅᔨᓴᕐᓂᕐᓄᑦ ᓄᓇᓕᖕᓂᓗ ᐃᓚᐅᖃᑕᐅᓂᕐᒧᑦ ᐱᓕᕆᐊᒃᓴᓂᑦ.

ᑐᓴᐅᒪᑎᑦᑎᔨ
ᑐᓴᐅᒪᑎᑦᑎᔨᑦ ᐊᐅᓚᑦᑎᔨᖓ ᑲᒪᒋᔭᒃᓴᖃᖅᐳᖅ ᐊᐅᓚᑦᑎᕙᒡᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᑭᒃᑯᑐᐃᓐᓇᓂᒃ ᐃᓚᐅᑎᑦᑎᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ ᐊᒻᒪ ᓄᓇᓕᖕᓂ ᑐᓴᐅᒪᑎᑦᑎᓂᕐᒧᑦ ᐱᓕᕆᐊᒃᓴᓂᒃ. ᑖᓐᓇ ᐃᓂᒋᔭᐅᔪᖅ ᐃᑲᔪᖅᑐᐃᕙᒃᐳᖅ ᐊᐅᓚᑦᑎᓂᕐᒥᒃ ᑲᑎᒪᓂᕐᒧᑦ ᐋᖅᑭᒃᓱᖅᑕᐅᓯᒪᔪᓂᒃ (ᐱᓕᕆᖃᑎᖃᖅᖢᓂ ᐱᓕᕆᕝᕕᒋᔭᐅᔪᒥ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᐊᐅᓚᑦᑎᓂᕐᒧᓪᓗ ᐱᓕᕆᕝᕕᒋᔭᐅᔪᓂᒃ ᑕᐃᒪᐃᑦᑕᕆᐊᖃᕌᒐᒥ) ᐱᔨᑦᑎᕋᖅᐸᒡᓗᓂᓗ ᖃᐅᔨᒋᐊᕐᕕᐅᓪᓗᐊᑕᖅᐸᒡᓗᓂ ᑭᒃᑯᑐᐃᓐᓇᓄᑦ, ᐱᑎᑦᑎᕙᒡᓗᓂ ᑐᙵᓇᕐᓂᕐᒥᒃ ᐊᑐᖅᑕᐅᔪᓐᓇᖅᑐᓂᒡᓗ ᐃᑲᔪᖅᑐᐃᓂᕐᒥᒃ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᖃᓄᐃᓕᐅᖅᑕᐅᔪᑦ ᒪᓂᓴᐅᑕᐅᑦᑎᐊᕋᓗᐊᕐᒪᖔᑕ ᐃᓚᐅᕙᒡᓗᑎᒡᓗ.

ᑭᒃᑯᑐᐃᓐᓇᕐᓄᑦ ᐊᑎᓕᐅᕆᓂᕐᒧᑦ ᑲᒪᔨ
ᐅᖃᕐᕕᖃᖅᐸᒡᓗᓂ ᐊᐅᓚᑦᑎᔨᒧᑦ, ᑭᒃᑯᑐᐃᓐᓇᕐᓄᑦ ᐊᑎᓕᐅᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑎᓕᐅᕆᓂᕐᒧᑦ ᑲᒪᔨ ᐃᑲᔪᖃᑦᑕᖅᐳᖅ ᐱᔭᐅᓂᖓᓂ ᐊᒻᒪ ᑐᓂᐅᖅᑲᐃᓂᕐᒥᑦ ᐱᓕᕆᐊᒃᓴᒧᑦ ᑐᒃᓯᕋᐅᑎᓂᑦ ᒪᓕᒡᓗᒍ ᑎᑎᕋᖅᓯᒪᓂᓕᒃ 12 ᓄᓇᕗᒻᒥ ᐊᖏᕈᑎᒥᑦ ᐊᒻᒪ ᐃᓚᖓ 3 ᓄᓇᕗᒻᒥ ᐸᕐᓇᐃᓂᕐᒧᑦ ᐱᓕᕆᐊᒃᓴᒧᓪᓗ ᖃᐅᔨᓴᕐᓂᕐᒧᑦ ᐱᖁᔭᕐᒥ, ᖃᐅᔨᒋᐊᕐᕕᐅᖅᑳᖅᐸᒃᖢᓂᑦ ᐊᒃᑑᑎᔪᓂᑦ ᖃᐅᔨᓴᕐᓂᕐᒧᑦ ᐊᒻᒪ ᑐᓴᐅᒪᑎᑦᑎᕙᒃᖢᓂᑦ ᐅᕝᕙᓘᓐᓃᑦ ᖃᐅᔨᒋᐊᖁᔨᕙᒃᖢᓂᑦ,  ᐊᒻᒪᓗ ᐊᐅᓚᑦᑎᓂᕐᒥᑦ ᐃᖏᕐᕋᓂᐅᔪᓂᑦ ᑐᑭᓯᒋᐊᕈᑎᐅᔪᓂᑦ ᐱᔾᔪᑎᖃᖅᑐᓂᑦ ᐊᕙᑎᓕᕆᓂᕐᒧᑦ ᖃᐅᔨᓴᕐᓂᐅᔪᓂᑦ.

ᑐᒃᓯᕋᐅᑕᐅᔪᓂᒃ ᕿᒥᕐᕈᔨ
ᐅᖃᕐᕕᖃᖅᐸᒡᓗᓂ ᐊᐅᓚᑦᑎᔨᒧᑦ, ᐊᒃᑐᖅᑕᐅᓂᕐᒧᑦ ᖃᐅᔨᓴᕐᓂᕐᒧᑦ, ᑖᓐᓇ ᖃᐅᔨᓴᖅᓯᕙᖕᓂᕐᒧᑦ ᐱᓕᕆᔨ ᐃᑲᔪᖃᑦᑕᕐᓂᐊᖅᐳᖅ ᐊᒃᑐᖅᓯᓂᕐᒧᑦ ᖃᐅᔨᓴᕐᓂᕆᔭᐅᔪᓂᒃ ᐱᓕᕆᐊᖑᔪᒪᔪᓄᑦ ᐱᕙᓪᓕᐊᓂᕆᔭᐅᔪᓄᑦ ᐱᓕᕆᐊᖑᔪᓄᑦ ᓇᐅᑦᑎᖅᓱᖅᓯᓂᕐᒧᓪᓗ ᐱᓕᕆᐊᖑᕙᒃᑐᓄᑦ ᐊᖏᖅᑕᐅᓯᒪᔪᓄᑦ ᐱᓕᕆᐊᒃᓴᓄᑦ ᑐᓐᓂᖅᑯᑕᐅᓯᒪᔪᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑎᑎᕋᖅᓯᒪᓂᖓᑕ 12 ᐊᑖᒍᑦ ᓄᓇᕗᒻᒥ ᐊᖏᖃᑎᒌᒍᑎᓂ ᐊᒻᒪᓗ ᑎᑎᕋᖅᓯᒪᓂᖓᓂ 3 ᐅᑯᓇᓂ, ᓄᓇᕗᒻᒥ ᐱᕙᒌᔭᕐᓂᕐᒧᑦ ᐱᓕᕆᐊᖑᔪᒥᒡᓗ ᖃᐅᔨᓴᖅᓯᓂᕐᒧᑦ ᐱᖁᔭᕐᒥ (NuPPAA−ᑯᑦ). ᑕᐅᑐᓪᓗᐊᑕᕐᓗᓂ ᑎᑎᕋᕐᕕᖕᒥᐅᑕᓕᕆᔾᔪᑎᓂᒃ ᖃᐅᔨᓴᖅᑕᐅᓂᕐᓂ ᓇᓃᓐᓂᖏᓐᓂ ᖃᐅᔨᓴᕈᑎᑦ, ᑖᓐᓇ ᐃᖅᑲᓇᐃᔮᒃᓴᖅ ᐃᑲᔪᕐᒥᓗᓂ ᖁᑦᑎᖕᓂᖅᓴᒥ ᐊᐅᓚᓂᓕᕆᔩᑦ ᐃᖅᑲᓇᐃᔭᖅᑎᖏᓐᓂ ᐊᒃᑑᑎᔪᓄᑦ ᖃᐅᔨᓴᕐᓂᕐᓂ ᖃᐅᔨᓴᐃᓐᓇᕐᓂᕐᓂᒃᓗ ᐱᓕᕆᐊᒃᓴᓂᑦ ᐱᕐᔪᐊᓄᑦ ᐱᕙᓪᓕᐊᔾᔪᑎᓄᑦ ᐱᓕᕆᐊᒃᓴᓄᑦ ᐊᒃᑐᐊᓂᓕᖕᓄᓪᓗ ᓄᓇᓕᖕᓂ ᐃᓚᐅᑎᑦᑎᓂᕐᓂ ᐱᓕᕆᐊᒃᓴᓂᑦ.

ᑮᓇᐅᔭᓕᕆᔨᒻᒪᕆᒃ
ᑮᓇᐅᔭᓕᕆᔨᒻᒪᕆᒃ ᖃᐅᑕᒫ ᑮᓇᐅᔭᓕᕆᖃᑦᑕᖅᐳᖅ, ᑮᓇᐅᔭᓕᕆᕙᒃᖢᓂ, ᐊᒻᒪ ᑭᓱᑐᐃᓐᓇᓂᒃ ᐊᒡᓚᕝᕕᓕᕆᔾᔪᑎᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.  ᑖᓐᓇ ᐃᖅᑲᓇᐃᔮᖅ ᐊᑐᐃᓐᓇᐅᑎᑦᓯᓂᐊᖅᑐᖅ ᐃᑲᔪᖅᑐᕐᓂᕐᒥᑦ ᑐᑭᒧᐊᑦᑎᑦᓯᔨᖓᓂᑦ, ᑮᓇᐅᔭᓕᕆᔨᒃᑯᑦ ᐊᐅᓚᑦᓯᕕᖓᓂᑦ ᑎᑎᕋᖅᓯᒪᔪᓂᑦ ᐊᐅᓚᑦᓯᓂᕐᒥᑦ, ᑎᑎᕋᖅᓯᒪᔪᓂᑦ ᐃᓕᐅᖅᑲᐃᓂᕐᒥᑦ, ᑮᓇᐅᔭᓕᕆᓂᕐᒥᑦ ᑮᓇᐅᔭᓕᕈᑎᓂᓪᓗ.

ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑎᒻᒪᕆᒃ
ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑎᒻᒪᕆᒃ ᓯᕗᓕᖅᑎᐅᕗᖅ ᐊᒃᑐᖅᑕᐅᓂᕐᒧᑦ ᖃᐅᔨᓴᖅᑕᐅᔪᓂᒃ ᑐᒃᓯᕋᐅᑕᐅᓯᒪᔪᓂᒃ ᐱᕙᓪᓕᐊᑎᑕᐅᔪᓂᒃ ᐱᓕᕆᐊᓂᒃ (ᐃᒪᓐᓇᐅᒐᔪᒃᖢᓂ ᑕᐃᒃᑯᐊ ᐱᔭᕆᑐᓂᖅᓴᑦ ᐊᒻᒪ/ᐅᕝᕙᓘᓐᓃᑦ ᐃᓄᖕᓄᑦ ᐃᓱᒫᓘᑕᐅᔪᑦ) ᐊᒻᒪ ᖃᐅᔨᓴᖅᑕᐅᔪᑦ ᐊᖏᖅᑕᐅᓯᒪᔪᑦ ᐱᓕᕆᐊᒃᓴᑦ ᐅᖃᐅᓯᐅᓯᒪᔪᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑎᑎᕋᖅᓯᒪᓂᓕᒃ 12-ᒥ ᓄᓇᕗᒻᒥ ᐊᖏᖃᑎᒌᒍᑎᒥ ᐊᒻᒪ ᐃᓚᖓᑦ 3 ᓄᓇᕗᒻᒥ ᐸᕐᓇᐃᔨᑦ ᐊᒻᒪ ᐱᓕᕆᐊᒧᑦ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA). ᐊᐅᓚᑦᑎᓪᓗᐊᑕᖅᐸᒡᓗᓂ ᖃᐅᔨᓴᖅᑕᐅᔪᓂᒃ ᐊᒻᒪ ᖃᐅᔨᓴᖅᐸᓪᓕᐊᔭᒥᒃ ᐱᓕᕆᐊᒃᓴᓂᒃ ᐊᖏᔪᓄᑦ ᐱᕙᓪᓕᐊᑎᑕᐅᔪᓄᑦ ᐱᓕᕆᐊᒃᓴᓄᑦ, ᑖᔅᓱᒥᖓ ᐃᖅᑲᓇᐃᔮᓕᒃ ᐱᓕᕆᐊᒃᓴᓂᒃ ᖃᐅᔨᒪᔨᒻᒪᕆᐅᑐᐃᓐᓇᕆᐊᖃᖅᐳᖅ ᐅᖃᐅᔾᔪᐃᕙᒡᓗᓂ ᐊᐅᓚᑦᑎᔨᒻᒪᕆᖕᓄᑦ ᐊᒻᒪ ᑲᑎᒪᔨᓄᑦ, ᓇᓗᓇᐃᖅᓯᕙᒡᓗᓂ ᖃᐅᔨᓴᖅᑕᐅᔪᑦ ᐱᓕᕆᐊᖑᒐᓗᐊᕐᒪᖔᑕ ᐊᔾᔨᒌᒃᑎᑦᑎᓗᑎᒃ, ᐊᔾᔨᒌᒃᑎᑦᑎᓗᑎᒃ ᐊᒻᒪ ᓈᒻᒪᖅᑯᑦᑎᓗᑎᒃ.

ᖃᕆᑕᐅᔭᓄᑦ ᐃᑲᔪᖅᑐᐃᓂᖕᒧᑦ ᑲᒪᔨ
ᖃᕆᑕᐅᔭᓄᑦ ᐃᑲᔪᖅᑐᐃᓂᖕᒧᑦ ᑐᑭᒧᐊᒃᑎᑦᑎᔨ ᐃᑲᔪᖅᐸᒃᐳᖅ ᒪᑭᒪᑎᑦᑎᓂᖕᒥᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᐃᑭᐊᖅᑭᕕᖏᓐᓂᑦ, ᑐᖅᑯᐃᕕᖕᓂᑦ ᐱᓕᕆᔾᔪᑎᓂᒡᓗ ᑲᑎᙵᐅᖅᑐᓂᑦ ᓇᖕᒥᓂᖅ−ᑐᑭᒧᐊᒃᑕᓂᑦ ᐱᓕᕆᐊᓂᑦ ᑐᓴᐅᒪᑎᑦᑎᕙᒡᓗᓂᓗ ᐃᓗᐊᓂᑦ ᐊᑐᒐᒃᓴᓂᑦ ᓯᓚᑖᓃᑦᑐᓂᒡᓗ ᐱᔨᑦᑎᕋᖅᑎᓂᑦ. ᓯᕗᓪᓕᖅᐸᐅᓪᓗᓂ ᖃᐅᔨᒋᐊᕐᕕᐅᖃᑦᑕᖅᐳᖅ ᑲᑎᒪᔨᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ ᑐᑭᓯᒋᐊᕈᑎᓄᑦ −ᖃᕆᑕᐅᔭᓕᕆᔾᔪᑎᓄᑦ (IT) ᐱᔭᐅᔭᕆᐊᖃᖅᑐᓂᒃ ᑲᒪᒋᔭᒃᓴᖃᓪᓗᐊᑕᖅᖢᓂᓗ ᑐᓴᖅᓴᐅᔪᓂᒃ/ᑕᑯᒃᓴᐅᔪᓂᒃ ᐃᑲᔪᖅᑐᐃᔾᔪᑎᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑲᑎᒪᔪᓂᒃ ᐊᒻᒪ ᐃᓄᓕᒫᓂᒃ ᑲᑎᒪᑎᑦᑎᔪᓂᒃ, ᐊᐅᓪᓚᑲᑕᒋᐊᖃᖅᐸᒃᖢᑎᒃ.